"Habar" arnasyndaǵy teledebat kezinde "Aýyl" partııasynyń ókili Jıgýlı Daırabaev dala demokratııasy, joǵary mádenıet, adam boıyndaǵy rýhanı kemeldilik erekshelikterin sóz etti. Eger el tizginin qolǵa alsa, qýatty agrarlyq salaǵa negizdelgen jańa Qazaq eliniń kóshin bastaýǵa talpynatynyn jetkizdi, dep habarlaıdy "Adyrna" ulttyq portaly.
Teledebat barysynda Jıgýlı Daırabaev Qazaq elin agro-órkenıet alpaýytyna aınaldyrýǵa sóz berdi. Qazirgi eńbek bólisi men qoǵamdaǵy jalań túsinikti synǵa aldy.
- Memleketimizdi damytýdy men úsh baǵytta kórip otyrmyn. Birinshisi - bizdiń ultymyzǵa tán dala demokratııasynyń prınıpterin ornatý. Naryqqa qaryq bolamyz dep osy qundylyqtardyń barlyǵyn joǵalttyq. Altyn besigimizdi, aýyldan shyqqan adamdy mensinbeıtin hálge jettik. Qaraıym eńbek adamyn qasterleýdi qoıdyq... Men bılik te baılyq ta halyqqa tıesili bolýyn sóz emes, is júzinde júzege asyramyn, - dedi kandıdat.
Sondaı-aq ol aýyl tirligin jandandyryp, sharýashylyqty qaryshtatyp damytýǵa ekpin qoıdy. Elimizdi sapaly jáne baǵasy qoljetimdi otandyq ónimmen toltyrylatyn agrarlyq derjavaǵa aınaldyrýǵa nyq bekingenin jetkizdi.
"Analardyń kóńili dalada emes, balada bolýy kerek. Ana tiliniń mártebesin arttyrý qajet, memlekettik tildi barlyq salaǵa tereń engizýimiz tıis, jastardy eńbekke baýlyp, ulttyq qundylyqtar men aǵa býynǵa qurmetti arttyramyz. Eger maǵan múmkindik berilse, osynyń barlyǵyn sóz júzinde emes, is júzinde dáleldeýge daıynmyn. Qazaqstan eńbekkerleri jasasyn", - dedi Daırabaev jaryssózde.
Ol jemqorlyqpen kúresti adamı-rýhanı tárbıeden bastaý qajettigin de atap ótti.
Esterińizge sala keteıik, Qazaqstan Prezıdentiniń merziminen tys saılaýy 20 qarashaǵa belgilengen.
"Adyrna" ulttyq portaly
