يتالياداعى سۇلۋلىق بايقاۋىنىڭ جەڭىمپازى اتانعان قازاق قىزى، استانالىق ايگەرىم ابىلقادىروۆا دزيۋدودان اتىراۋدا ءوتىپ جاتقان قازاقستان بىرىنشىلىگىندە جەڭىمپاز اتاندى، دەپ حابارلايدى “ادىرنا” ۇلتتىق پورتالى.
ايگەرىم 52 كەلى سالماقتا توپ جاردى. ول فينالدا اقمولا وبلىسىنىڭ وكىلى تولعاناي ابەۋوۆادان باسىم تۇسكەن. بۇل – ايگەرىم ابىلقادىروۆانىڭ قازاقستان چەمپيوناتىندا جەڭىپ العان 12-التىنى.
دزيۋدوشى قىزدىڭ سۇلۋلىق الەمىندەگى جەتىستىكتەرى دە از ەمەس. ول بيىل يتاليادا وتكەن «Miss Europe Continental-2022» بايقاۋىندا جەڭىسكە جەتكەن بولاتىن.
سونداي-اق، ايگەرىم ابىلقادىروۆا – گرەپپلينگتەن ايەلدەر اراسىندا قازاقستاننان شىققان تۇڭعىش ءارى جالعىز الەم چەمپيونى.
وسىدان ەكى جىل بۇرىن جاراقات الىپ، ۇلكەن سپورتتان الىستاعان دزيۋدوشى تاتاميگە ءىرى جەڭىسپەن ورالىپ وتىر.
ايتا كەتەيىك، 52 كەلى سالماق دارەجەسىندەگى قولا مەدالدى ماڭعىستاۋلىق گۇلدانا المۇحانبەتوۆا ەنشىلەدى.
