قارالى حاباردى قر جازۋشىلار وداعى باسقارماسىنىڭ توراعاسى ۇلىقبەك ەسداۋلەت جەتكىزدى. اقىن ءوزىنىڭ Facebook-تەگى پاراقشاسىندا:
"...استانادان تاڭ بوزىمەن تاعى ءبىر اۋىر حابار جەتتى - ارقالى اقىن قونىسباي ءابىل دۇنيەدەن ءوتىپتى! جالعان-اي!.. قازاقستاننىڭ حالىق اقىنى، اتاقتى ايتىسكەر، التى الاشتىڭ ارداقتىسى، ءسوز سۇلەيى، سايىپقىران ساتيريك، قارىمدى قالامگەر، ءتىل جاناشىرى، وت اۋىزدى، وراق ءتىلدى، سەگىز قىرلى، ءبىر سىرلى اسىل ازامات بۇل پانيدەن باقيعا كوشىپتى! كوكىرەگىم قارس ايىرىلا وتىرىپ، مارقۇمنىڭ وتباسىنا، اياۋلى اقىنىن قادىرلەيتىن حالقىمىزعا كوڭىل ايتامىن. باقۇل بول، دوسىم! جانىڭ جانناتتا بولسىن!" - دەپ جازدى.
وقىرمانعا قونىسباي ءابىل حاققىندا عۇمىر-دەرەك ۇسىنامىز.
قونىسباي ءابىل 1954 جىلى 21 مامىردا قوستاناي وبلىسى، جانگەلدى اۋدانىندا دۇنيەگە كەلگەن.
قازمۇۋ، جۋرناليستيكا فاكۋلتەتىنىڭ تۇلەگى. كەزىندەگى "لەنينشىل جاس" (قازىرگى "جاس الاش") گازەتىنىڭ تورعاي، تسەلينوگراد وبلىستارى بويىنشا مەنشىكتى ءتىلشىسى بولعان. ودان بولەك "تورعاي تاڭى", "ارقالىق تاڭى" گازەتتەرىندە باسشىلىق قىزمەت اتقاردى. تورعاي وبلىستىق تەلەراديو كومپانياسىنىڭ توراعاسى بولعان. "قازاقستان ايتىس اقىندارى مەن جىرشىلار وداعىنا" تىزگىندىك ەتكەن. ءتۇرلى دەڭگەيدە ءتىل ساياساتىنا اتسالىسقان بىلىكتى مامان. سونىمەن قاتار ول ۇلتىمىزدىڭ ۇمىت بولا جازداعان ۇلى ونەرى – اقىندار ايتىسىنىڭ حالقىمىزعا قايتا ورالۋىنا، ونىڭ وركەندەپ دامۋىنا قوماقتى ۇلەس قوسقان الدىڭعى قاتارداعى لەكتىڭ وكىلى.
"ادىرنا" ۇجىمى قازاقتىڭ ايبوز اقىنىنىڭ وتباسىنا، وقىرماندارىنا، شاكىرتتەرى مەن جورا-جولداستارىنا قايعىرا وتىرىپ كوڭىل ايتادى.
"ادىرنا" ۇلتتىق پورتالى
