Qazaqstannyŋ halyq aqyny, belgılı aitysker, satirik, kompozitor, jurnalist Qonysbai Äbıl 68 jasqa qaraǧan şaǧynda dünieden ozdy, dep habarlaidy "Adyrna" ūlttyq portaly.
Qaraly habardy QR Jazuşylar odaǧy basqarmasynyŋ töraǧasy Ūlyqbek Esdäulet jetkızdı. Aqyn özınıŋ Facebook-tegı paraqşasynda:
"...Astanadan taŋ bozymen taǧy bır auyr habar jettı - arqaly aqyn Qonysbai Äbıl dünieden ötıptı! Jalǧan-ai!.. Qazaqstannyŋ Halyq aqyny, ataqty aitysker, alty Alaştyŋ ardaqtysy, söz süleiı, saiypqyran satirik, qarymdy qalamger, tıl janaşyry, ot auyzdy, oraq tıldı, segız qyrly, bır syrly asyl azamat būl päniden baqiǧa köşıptı! Kökıregım qars aiyryla otyryp, marqūmnyŋ otbasyna, aiauly aqynyn qadırleitın halqymyzǧa köŋıl aitamyn. Baqūl bol, dosym! Janyŋ jannatta bolsyn!" - dep jazdy.Oqyrmanǧa Qonysbai Äbıl haqqynda ǧūmyr-derek ūsynamyz. Qonysbai Äbıl 1954 jyly 21 mamyrda Qostanai oblysy, Jangeldı audanynda düniege kelgen. QazMŪU, jurnalistika fakultetınıŋ tülegı. Kezındegı "Leninşıl jas" (qazırgı "Jas Alaş") gazetınıŋ Torǧai, Selinograd oblystary boiynşa menşıktı tılşısı bolǧan. Odan bölek "Torǧai taŋy", "Arqalyq taŋy" gazetterınde basşylyq qyzmet atqardy. Torǧai oblystyq teleradio kompaniiasynyŋ töraǧasy bolǧan. "Qazaqstan aitys aqyndary men jyrşylar odaǧyna" tızgındık etken. Türlı deŋgeide tıl saiasatyna atsalysqan bılıktı maman. Sonymen qatar ol ūltymyzdyŋ ūmyt bola jazdaǧan ūly önerı – aqyndar aitysynyŋ halqymyzǧa qaita oraluyna, onyŋ örkendep damuyna qomaqty üles qosqan aldyŋǧy qatardaǧy lektıŋ ökılı. "Adyrna" ūjymy qazaqtyŋ aiboz aqynynyŋ otbasyna, oqyrmandaryna, şäkırtterı men jora-joldastaryna qaiǧyra otyryp köŋıl aitady.
"Adyrna" ūlttyq portaly
Ūqsas jaŋalyqtar
