ءبىر جىل بۇرىن ەلدە الاشتى عانا ەمەس، الەمدى دۇرلىكتىرگەن "قاڭتار وقيعاسى" بولدى. قازاق حالقىنىڭ قازىناسىن ەكى اساپ، ءبىر جەۋگە دانىككەندەرگە قارسى حالىق جاپپاي كوتەرىلدى. ەلدەگى گاز باعاسىنىڭ قىمباتتانۋى، الەۋمەتتىك قايشىلىقتار، ءومىر ساپاسىنىڭ ناشارلاۋى، كلانارالىق تارتىستار سىندى بەلگىلەر حالىقتىڭ سوقتاسىن سۋىتىپ، جالپى جۇرتتى اشىندىردى. "ادىرنا" ۇلتتىق پورتالى بولعان وقيعاعا قاتىستى ساراپتاماشى جۋرناليست، بەلگىسى قوعام بەلسەندىسى اسىلحان مامانۇلىنىڭ تالداۋىن ۇسىنادى.
جۋرناليست اسىلحان ماماشۇلى "قاڭتار وقيعاسىنىڭ" تاريحي ماڭىزى مەن ساياسي سالماعىنا ۇڭىلە كەلە توەندەگىدەي قورىتىندىعا كەلگەن.
- جولداستار، قاڭتار كوتەرىلىسى ناتيجەسىز اياقتالدى دەمەڭىزدەر، وسى كوتەرىلىس ءالى دە ونداعان جىلعا جالعاسۋى مۇمكىن نازارباەۆ جۇيەسىنە ءداۋ نۇكتە قويدى. نۇرپارتياسى مەن باسقا نوكەرلەرى قالا ما، جوق پا ءبارىبىر، ەندى ساياسي ريتوريكا باسقا بولادى. ءبىز نازارباەۆ داۋىرىنەن كەيىنگى كەزەڭگە كوشتىك. ەكى پرەزيدەنتتىڭ ەل بيلىگىن ويىنشىققا اينالدىرعانى، بيلىك ءترانزيتىن جاساعانسىپ، سپەكتاكل قويعانى – جۇزدەگەن شاڭىراقتىڭ تراگەدياسىمەن اياقتالدى. تراگەديا سۇراۋسىز كەتپەيدى.قازاقستاندا قوس بيلىك بارىن، دە فاكتو نازارباەۆ ىقپالى باسىم بولعانىن بۇلار قاڭتار كوتەرىلىسىنەن كەيىن عانا مويىندادى. قاڭتار كوتەرىلىسى نازارباەۆتىڭ وتىز جىل بويى قۋلىق-سۇمدىقپەن جيناعان سۋپەر پرەزيدەنتتىك بيلىگىن توقاەۆقا ءبىر كۇندە اپەردى. سول ءۇشىن ول راقمەت ايتۋى كەرەك ەدى. توقاەۆ نۇرپارتيا سيەزىندە نازارباەۆ ەڭبەگىنە جوعارى باعا بەردى، جەتىستىكتەرىن كوبىرەك ايتايىق دەدى. وسى سوزىمەن نازارباەۆتى تاريحقا جىبەردى جانە باعا بەرۋ كەزەڭىنە جول اشتى.
اسىلحان ماماشۇلىنىڭ بىرقاتار بولجامدارىنىڭ شىندىققا ۇلاسقانىنا كوز جەتكىزۋ قيىن ەمەس. اۆتور "استانا" اتاۋىنىڭ قايتا ورالاتىنىن دا ايتقان ەدى. 2022 جىلى 17 قىركۇيەكتە پرەزيدەنت قاسىم-جومارت توقاەۆ جارلىعىمەن استانا اتاۋى قايتارىلدى. ەلدەگى ساياسي وقيعانىڭ الداعى ۋاقىتتا قانداي باعىتتا وربەيتىندىگىنە قاتىستى:
- مۇنان بىلاي ساياسي قىزمەتكەرلەر دە نازارباەۆتىڭ ەڭبەگى مەن قاتەلىگىن قاتار ايتاتىن بولادى. بىراق ول ۇزاققا سوزىلمايدى. قايسىسى باسىم ەكەنى ءمالىم. نۇر–سۇلتان قالاسى، جۇزدەگەن نازارباەۆ ەسكەرتكىشى مەن كوشەلەرى تۇرعاندا توقاەۆ ايتا باستاعان "تۇبەگەيلى ساياسي وزگەرىس" بولمايدى. دەمەك، استانا اتاۋى قايتار كۇن الىس ەمەس. ونى توقاەۆ وزگەرتە مە، بوقاەۆ وزگەرتە مە، كوپ قالعان جوق.كەشەگى جيىندا توقاەۆتىڭ "وتكەندى جوققا شىعاراتىن، ەل باسشىلارىنا شابۋىل جاسايتىن حالىقتىڭ بولاشاعى بۇلىڭعىر" دەگەن ءسوزىن كوڭىلگە الماڭىزدار. "بىرەر جىلدان سوڭ مەن دە كەتەم، تيىسپەڭدەرشى" دەگەنى. بىراق قازاق حالقىنىڭ ەشكىمگە گارانتيا بەرمەيتىنى، رەتى كەلگەندە ارەكەتىنە قاراي باعالايتىنى تۇسىنىكتى بولدى ەمەس پە؟ - دەپ جازدى جۋرناليست.
"ادىرنا" ۇلتتىق پورتالى
