ەلىمىزدە مەكتەپ باعدارلامالارى جاڭارتىلادى. بۇل تۋرالى بۇگىن وقۋ-اعارتۋ مينيسترلىگىنىڭ كەڭەيتىلگەن القا وتىرىسىندا ۆەدومستۆو باسشىسى عاني بەيسەمباەۆ ايتتى، دەپ جازادى "ادىرنا" ۇلتتىق پورتالى.
Baq.kz حابارلاۋىنشا، مينيستر ورتا ءبىلىم بەرۋدەگى نەگىزگى ماسەلە – ءبىلىم مازمۇنى مەن ءبىلىم ساپاسى ەكەنىن اتاپ ءوتتى.
2016 جىلدان 2021 جىلعا دەيىن مەكتەپتەر جاڭارتىلعان باعدارلامالارعا كوشتى. كريتەريالدى باعالاۋ جۇيەسى ەنگىزىلدى. بۇل وتە ماڭىزدى ءۇردىس بولدى. دەگەنمەن مونيتورينگتىك زەرتتەۋلەرگە سايكەس، جەكەلەگەن پاندەر بويىنشا وقۋ باعدارلامالارى، جەتىلدىرۋدى قاجەت ەتەدى، - دەپ ايتتى بەيسەمباەۆ.
وسىعان وراي، وقۋ-اعارتۋ ءمينيسترى ۆەدومستۆو مەكتەپ باعدارلامالارىن جاڭعىرتۋ جۇمىسىن باستاعانىنا توقتالدى.
قازىر جۇمىس توبى قۇرىلدى، جاڭا مەملەكەتتىك ستاندارتتار مەن وقۋ باعدارلامالارى ازىرلەنىپ جاتىر. وزدەرىڭىز بىلەتىندەي، بىلتىرعى وقۋ جىلىنان باستاپ قازاق تىلىندە وقىتاتىن سىنىپتاردا 1-سىنىپتان تەك قازاق ءتىلىن وقىتۋدى ەنگىزدىك. ورىس ءتىلى 2-سىنىپتان باستاپ، ال اعىلشىن ءتىلىن وقىتۋ 3-سىنىپتان باستاپ وقىتىلادى. ورىس تىلىندە وقىتاتىن سىنىپتاردا قازاق جانە ورىس تىلدەرى جۇرگىزىلەدى، - دەپ ايتتى ول كەڭەيتىلگەن القا وتىرىسىندا.
عاني بەيسەمباەۆتىڭ ايتۋىنشا، مەملەكەت باسشىسىنىڭ تاپسىرماسى بويىنشا جوعارى سىنىپتاردا جاراتىلىستانۋ-ماتەماتيكالىق تسيكل پاندەرىن وقىتۋ تالاپتارى كۇشەيتىلدى جانە 5-11 سىنىپتار ءۇشىن ومىرلىك قاجەتتى باعىتتاردى يگەرۋ بويىنشا «جاھاندىق قۇزىرەتتىلىك» كۋرسى، باستاۋىش سىنىپتاردا شاحمات بويىنشا فاكۋلتاتيۆ ەنگىزىلدى.
"ادىرنا" ۇلتتىق پورتالى
