بۇگىن، 6 اقپان كۇنى 4%-دىق جەڭىلدىكپەن اۆتونەسيەگە ءوتىنىم بەرۋ باستالعان بولاتىن. الايدا، پورتال جۇكتەمەنى كوتەرە الماي قالعان. ءتىپتى، ساعات 10:00-ءدىڭ وزىندە 761 ادام تىركەلىپ ۇلگەرگەن. بۇل تۋرالى جۋرناليست دياس نۇراقىن Facebook پاراقشاسىندا جازدى، دەپ حابارلايدى “ادىرنا” ۇلتتىق پورتالى.
“ەلەكتروندى كەزەككە دەگەن كۇمان قويۋلاندى. تانىستارىم، دوستارىم، وقىرماندارىمنىڭ ەشقايسىسى تىركەلمەگەن. كەيبىرى وسى كەزەكتى مەن ويلاپ تاپقانداي جەكەگە جازىپ، رەنجىپ جاتىر.
تاڭنان بەرى 50 شاقتى ادام حابارلاستى. سونىڭ بىردە بىرەۋى ىلىكپەگەن. ماقتاۋلى پورتالدارى جۇكتەمەنى كوتەرە الماي قالدى. بىراق ينسايدەرلىك اقپارات بويىنشا 761 ادام ءوتىنىش بەرىپ ۇلگەرىپتى. سوڭعى زاياۆكا 10,00 دە تىركەلىپتى. دەمەك ءبىز كلاۆياتۋرانى توقپاقتاپ، ەتسپ-نىڭ قۇپيا ءسوزىن جازىپ، اشىلماي قالعان كولىك ءوندىرۋشى دەگەن باتىرمانى باسا الماي وتىرعاندا، ء"وز ادامدارى" تىركەلىپ كەتكەن. بىراق قازاننىڭ قاقپاعىن ۇستاپ وتىرعانداردىڭ قانداي قۇيتىرقىلىققا بارعانىن دالەلدەۋ قيىن”،- دەپ جازدى ول.
سونداي-اق، دياس نۇراقىن باعدات مۋسين مەن ونەركاسىپتى دامىتۋ قورىنان تەكسەرۋدى تالاپ ەتتى.
“مۋسين باعدات مىرزا ەلەكتروندى كەزەكتىڭ اشىق ءارى ءادىل بولعانىن حالىققا دالەلدەپ بەرىڭىزدەر.
ونەركاسىپتى دامىتۋ قورى ارنايى بريفينگ وتكىزىپ، كەزەككە كىمدەردىڭ تىركەلگەنىن جاسىرماي جاريالاڭىزدار. قاي قالا، قاي وبلىستان ەكەنى دە ماڭىزدى. نە سەبەپتى "وششيبكا" دەگەن ءسوزدىڭ شىعا بەرگەنىن تۇسىندىرىڭىزدەر. نە سەبەپتى "كولىك ءوندىرۋشىنى تاڭداۋ" دەگەن باتىرمانىڭ شىقپاي قالعانىن اشىق ايتىڭىزدار. مەنىڭ ويىمشا وسىنىڭ ءبارى بەلگىلى ءبىر ادامداردىڭ عانا تىركەۋگە تۇرۋى ءۇشىن ادەيى، قولدان قاساقانا جاسالعان كەدەرگىلەر بولدى.
قر يندۋستريا جانە ينفراقۇرىلىمدىق دامۋ مينيسترلىگى تۇيەقۇس قۇساپ، باستارىڭىزدى قۇمعا تىعىپ الىپ وتىرۋدى قويۋ كەرەك. ەستيتىن ۇكىمەت قاعيداسىنا ساي حالىقتىڭ جاپپاي نارازىلىعىن تۋدىرعان جەڭىلدەتىلگەن اۆتونەسيە باعدارلاماسىنداعى كەمشىلىكتەرگە قاتىستى ءوز ويلارىڭىزدى ايتىڭىزدار. ءتىپتى بۇگىنگى ەلەكتروندى كەزەك ناتيجەسىن جارامسىز دەپ تانىپ، قايتا وتكىزۋدى تالاپ ەتەمىز”، - دەپ جازدى جۋرناليست.
