ءداستۇرلى ونەر باسا دارىپتەلۋى ءتيىس

2350
Adyrna.kz Telegram

بۇگىن «الاتاۋ» ءداستۇرلى ونەر تەاترىنا قر پارلامەنتى ءماجىلىسىنىڭ دەپۋتاتى دارحان قامزابەكۇلى مىڭباي كەلدى.  الماتى قالاسى، الاتاۋ اۋداندىق "نۇر وتان" پارتياسى فيليالى مەن "الاتاۋ" ءداستۇرلى ونەر تەاترىنداعى «مادەنيەت» پارتيالىق باستاۋىش ۇيىمىنىڭ باستاماسىمەن كەلگەن حالىق قالاۋلىسىنا  ديرەكتوردىڭ شىعارماشىلىق ماسەلەلەر جونىندەگى ورىنباسارى ازامات اقان، باس رەجيسەر جۇلدىزبەك جۇمانباي، كوركەمدىك جەتەكشى دينا وباەۆالار تەاتردىڭ بۇگىنگى تىنىس-تىرشىلىگى جونىندە بايانداپ، الداعى جوسپارلارمەن ءبولىستى.

«2018 جىلى تەاترىمىزدا فولكلورلىق-ەتنوگرافيالىق ءانسامبلى، بيشىلەر توبى، اكتەرلار ترۋپپاسى قۇرىلدى. وسىلاردىڭ ءبارىنىڭ باسىن ساحنالىق قويىلىمداردا قوسا وتىرىپ ءداستۇرلى ونەرىمىزدىڭ سينتەزدەلگەن ۇلگىسىن كورەرمەندەرىمىزگە ۇسىنعىمىز كەلەدى. وتكەن جىلى العاش بولىپ تۇركسوي حالىقارالىق ۇيىمىمەن بىرلەسىپ تۇركىتىلدەس حالىقتاردىڭ «الاتاۋ الابىندا» اتتى ءداستۇرلى ونەر فەستيۆالىن وتكىزدىك. تىرناقالدى تۋىندىمىز جىر الىبى جامبىلدىڭ ءومىرىنىڭ كەيبىر تۇستارىن سۋرەتتەيتىن «جىر-جولبارىس» قويىلىمى دا كورەرمەن تاراپىنان جوعارى باعالاندى»، - دەدى تەاتردىڭ باس رەجيسەرى جۇلدىزبەك جۇمانباي.

دارحان قامزابەكۇلى دا  «جىر-جولبارىس» قويىلىمى حالىقتىڭ ىستىق ىقىلاسىنا بولەنىپ جاتقانىن ەستىپ، ءبىلىپ وتىرعانىن،  بولاشاقتا وسىنداي ۇلتتىق ناقىشتاعى قويىلىمدارعا كوبىرەك ءمان بەرۋ كەرەكتىگىن باسا ايتتى.

تەاتردىڭ باستى ماقساتى جانە باسقا تەاترلاردان ەرەكشەلىگى ءداستۇر مەن ۇلتتىق ونەردى دارىپتەپ، ءوز كورەرمەنىمىزدى قالىپتاستىرۋ. بيىلعى جىل جاستار جىلى بولعاندىقتان قالامىزداعى ءىرى وقۋ ورىندارىنىڭ ستۋدەنتتەرى اراسىندا ءداستۇرلى ونەر فەستيۆالىن وتكىزبەكپىز. سونىمەن قوسا «قىز جىبەك» سىندى جىر-داستاندارىمىزدى جاڭا فورماتتا ساحىنالاساق دەگەن ويلارىمىز بار. «قىمىزحانا» اتاۋىمەن شاعىن اۋديتورياعا ارنالعان ءداستۇرلى ءان، جىر، كۇيشىلىك ونەرلەردىڭ ءار مەكتەبىنىڭ وكىلدەرىن قاتىستىرا وتىرىپ لەكتسيا كونتسەرت تۇرىندەگى تانىمدىق دۇنيەلەردى ىسكە اسىرساق دەپ جوسپارلاپ وتىرمىز. ءجاسوسپىرىم كورەرمەندەرىمىزگە ارنالعان دا جوبالارىمىز بار. وعان تەاترىمىزدىڭ بارلىق مۇمكىندىكتەرى جەتەدى»، - دەپ اتاپ ءوتتى جۇلدىزبەك جۇمانباي.

تەاتر ۇجىمىمەن كەزدەسۋ بارىسىندا  دارحان قامزابەكۇلى «الاتاۋ» ءداستۇرلى ونەر تەاترى ءداستۇردى دارىپتەيتىن ەلىمىزدەگى بىرەگەي ونەر وشاعى ەكەنىنە توقتالدى. باسشىلارىڭىز ونەر مەن عىلىمدى تەڭ ۇستاعان ازامات.  شىعارماشىلىق جاعىنداعى جەتەكشىلەرىڭىز بار بارلىعى كاسىبي ماماندار. قاراپ وتىرسام ۇجىمدارىڭىزعا  كىلەڭ جاستار جينالعان ەكەن. سىزدەردى بىرىكتىرىپ وتىرعان ورتاق يدەيا – ءداستۇرلى ونەرگە دەگەن قۇشتارلىق دەپ ويلايمىن. بيىلعى  جاستار جىلىندا «بىزگە نە ايتسا، سونى جاسايمىز» دەپ قاراپ وتىرماي، وزدەرىڭىز يدەيا ۇسىنىپ، ىسكە اسىرىڭىزدار.  ەلباسىمىزدىڭ ءوزى باسا كوڭىل ءبولىپ وتىرعان ۇلتتىق قۇندىلىقتارىمىزدى الەمگە تانىتاتىن سىزدەرسىزدەر. الداعى جۇمىستارىڭىزعا تابىس تىلەيمىن»، - دەپ، تەاتردىڭ اتقارىپ جاتقان جۇمىستارىنا ريزاشىلىعىن جەتكىزدى.

         «الاتاۋ» ءداستۇرلى ونەر تەاترىنىڭ ءباسپاسوز قىزمەتى

پىكىرلەر