NIS-تە رەسپۋبليكالىق پاندىك وليمپيادانىڭ جەلىلىك كەزەڭى ءوتتى

6559
Adyrna.kz Telegram

قاتىسۋشىلار تىزىمىندە 500-دەن استام وقۋشى، ولاردىڭ ارقايسىسى ماتەماتيكا، فيزيكا، حيميا، بيولوگيا، گەوگرافيا، ينفورماتيكا، تاريح، قۇقىقتانۋ نەگىزدەرى، سونداي-اق قازاق، ورىس، اعىلشىن تىلدەرى بويىنشا بىلىمدەرىن سىنايدى.

جاراتىلىستانۋ-ماتەماتيكالىق باعىتتاعى پاندەر بويىنشا تالدىقورعان قالاسىنداعى نازارباەۆ زياتكەرلىك مەكتەبىنىڭ نامىسىن 26 وقۋشى قورعادى.
10-سىنىپ وقۋشىسى الي قاسىم جەلىلىك وليمپياداعا ەكىنشى جىل قاتىسىپ وتىر. سوڭعى وليمپيادادا ماتەماتيكا پانىنەن ءۇشىنشى ورىندى جەڭىپ الدى. ءاليدىڭ ايتۋىنشا، وليمپيادالىق قوزعالىس – تابىسقا، ناتيجەگە جەتكىزە بىلەتىن ونەر.
9-سىنىپ وقۋشىسى ارينا شيرياەۆا ءۇشىن حيميا – ەڭ سۇيىكتى ءپان. 10-11 سىنىپتارعا ارنالعان تاقىرىپتاردى باتىل ۇسىناتىن وليمپيادا ارينا ءۇشىن قىزىقتى تاجىريبە. وليمپيادانىڭ بۇل ءتاسىلى ونى قورقىتپايدى، كەرىسىنشە، تەك ىنتالاندىرادى.


16-17 اقپاندا قوعامدىق-گۋمانيتارلىق پاندەر بويىنشا جەلىلىك وليمپيادا ءوتتى. بۇل باعىتتا 16 وقۋشى بىلىمدەرىن سىنادى.
قازاق ءتىلى 10-سىنىپ وقۋشىسى الان كيم ءۇشىن سۇيىكتى ءارى جەڭىل پاندەردىڭ ءبىرى. بۇل جولى ول ءوز ءبىلىمىن جەلىلىك وليمپيادادا سىناۋدى ءجون كوردى.
– 6-سىنىپقا دەيىن قازاق سىنىبىندا وقىدىم. وليمپياداداعى بارلىق تاپسىرمالار مەن ءۇشىن تۇسىنىكتى جانە قاراپايىم بولىپ كورىندى. كوپتەگەن ادامدار انا ءتىلى اتا-اناسىنان دارىيدى دەپ ويلايدى. مەنىڭ ويىم، ءتىل ءبىلۋ – قالىپتاسقان داعدى، — دەيدى الان.
جەلىلىك كەزەڭنىڭ جەڭىمپازدارى مەن جۇلدەگەرلەرى ناۋرىز-ءساۋىر ايلارىندا وتەتىن رەسپۋبليكالىق وليمپيادادا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ قۇراماسىن تانىستىرادى.

پىكىرلەر