اقساقالدىڭ اق ءتۇستى "ۆاز-2101" كولىگى 1970 جىلى شىققان. ونى ءوزى 1979 جىلى ساتىپ العان. تۇرعىنداردى تەگىن تاسۋعا تاپتىرماس تەمىر تۇلپار بەلگىلى "جيگۋلي" ماركاسىنىڭ ەڭ العاش شىققان ءونىمى. جاقسىلىق جولىندا سەرىگىنە اينالعان كولىگىن ءاستابي بۇلقانوۆ ساتقىسى دا، ايىرباستاعىسى دا كەلمەيدى. قىستىڭ كوزى قىراۋدا بوي شيراپتىپ، كۇنىنە ەكى ساعات ادامداردى تەگىن دىتتەگەن جەرىنە جەتكىزىپ سالادى.
"حابار 24" ارناسىنىڭ حابارلاۋىنشا، اقساقالدىڭ كورشى-قولاڭى دا ونىڭ ازاماتتىق ىستەرىنە ءدان ريزا.
- بوراندى كۇندەرى اۆتوبۋسقا بارمايسىڭ، وستانوۆكا الىس. سونداي كەزدە وسى كىسىگە بارامىز. بۇل كىسىمەن كورشىمىز، ءبىر ۇيدە. قىسىلعاندا كەز-كەلگەن جەرگە اپارىپ تاستايدى، بۇلدامايدى، اقى بەرسەڭ المايدى، سول راقمەتىمىزدى ايتامىز دا كەتەمىز، - دەدى قالا تۇرعىنى مۇرات قۇسايىن.
ءاستابي بۇلقانوۆتىڭ اق تۇلپارى قاراعاندى مەن قارقارالى باعىتتارىندا دا قاتىناپ، الىس جولدى ءاپ-ساتتە ەڭسەرەتىن كورىنەدى. ۇلى ءتاۋىرجان بۇلقانوۆ تا جومارت جۇرەكتى اكەسىنىڭ قام-قارەكەتىنە قۋانىشتى:
- تالاي ايتتىق، نەمەرەلەرى دە ايتتى، اتا مىنانى ساتىپ جىبەر، جاڭاسىن الايىق دەپ. قيمايدى، كوزىندەي كورەدى. وسىنىڭ قاي جەرى سىنسا دا، سونى ۆەلوسيپەد جوندەگەندەي قىلىپ جوندەپ الادى. جاسىراتىنى جوق بۇل ءبىز ءۇشىن قۇتتى ماشينا، وسىمەن وسى ۇيگە تالاي كەلىن ءتۇستى. تالاي قۇدالىقتارعا باردىق.
ادامدىققا اسەمپاز ءاستابي قاريا وتىزىنشى جىلداردىڭ دۇربەلەڭىندە دۇنيەگە كەلگەن. بالا جاستان بەلى قايىسىپ، ەڭبەككە ەرتە ارالاسقان. 17 جاسىندا تەحنيكا تىزگىندەپ، تىڭعا تۇرەن سالعان تۇلعا. اقساقالدىڭ ەندىگى ماقساتى - اق تۇلپارىنىڭ رەترو-كولىكتەر قاتارىنان كورىنۋى. وتباسى دا اۋلەت تىرەگىنىڭ تۇلپارىمەن بىرگە جاقسىلىقتار جولىندا جۇيىتكي بەرەتىنىنە ناق سەنىمدى.
"ادىرنا" ۇلتتىق پورتالى
