Aqsaqaldyń aq tústi "Vaz-2101" kóligi 1970 jyly shyqqan. Ony ózi 1979 jyly satyp alǵan. Turǵyndardy tegin tasýǵa taptyrmas temir tulpar belgili "Jıgýlı" markasynyń eń alǵash shyqqan ónimi. Jaqsylyq jolynda serigine aınalǵan kóligin Ástábı Bulqanov satqysy da, aıyrbastaǵysy da kelmeıdi. Qystyń kózi qyraýda boı shıraptyp, kúnine eki saǵat adamdardy tegin dittegen jerine jetkizip salady.
"Habar 24" arnasynyń habarlaýynsha, aqsaqaldyń kórshi-qolańy da onyń azamattyq isterine dán rıza.
- Borandy kúnderi avtobýsqa barmaısyń, ostanovka alys. Sondaı kezde osy kisige baramyz. Bul kisimen kórshimiz, bir úıde. Qysylǵanda kez-kelgen jerge aparyp tastaıdy, buldamaıdy, aqy berseń almaıdy, sol raqmetimizdi aıtamyz da ketemiz, - dedi qala turǵyny Murat Qusaıyn.
Ástábı Bulqanovtyń aq tulpary Qaraǵandy men Qarqaraly baǵyttarynda da qatynap, alys joldy áp-sátte eńseretin kórinedi. Uly Táýirjan Bulqanov ta jomart júrekti ákesiniń qam-qareketine qýanyshty:
- Talaı aıttyq, nemereleri de aıtty, ata mynany satyp jiber, jańasyn alaıyq dep. Qımaıdy, kózindeı kóredi. Osynyń qaı jeri synsa da, sony velosıped jóndegendeı qylyp jóndep alady. Jasyratyny joq bul biz úshin qutty mashına, osymen osy úıge talaı kelin tústi. Talaı qudalyqtarǵa bardyq.
Adamdyqqa ásempaz Ástábı qarııa otyzynshy jyldardyń dúrbeleńinde dúnıege kelgen. Bala jastan beli qaıysyp, eńbekke erte aralasqan. 17 jasynda tehnıka tizgindep, tyńǵa túren salǵan tulǵa. Aqsaqaldyń endigi maqsaty - aq tulparynyń retro-kólikter qatarynan kórinýi. Otbasy da áýlet tireginiń tulparymen birge jaqsylyqtar jolynda júıitkı beretinine naq senimdi.
"Adyrna" ulttyq portaly
