“Balalary tastap ketken”: Jambylda kelini óz atasyn úıinen qýyp jiberdi

2394
Adyrna.kz Telegram

Jetpis tórt jasar Jýsanbaı Ońǵarbaev aqsaqaldy kelinderi úıinen qýyp jibergen. Barar jer, basar taýy qalmaǵan aqsaqal shaǵyn temirjol beketin panalaǵan. Qarııa ózine qol ushyn sozǵan temirjolshylarmen tildesip, qarttar úıine barǵysy keletinin, alaıda jón-josyǵyn bilmeıtinin jetkizdi. Tipti, taǵdyr taýqymenin tartyp, kóńili qulazyǵan aqsaqaldyń nár tatpaǵanyna birneshe kún bolǵan. Bul týraly jýrnalıst Danııar Álimqul óz paraqshasynda habarlady, dep jazdy "Adyrna" ulttyq portaly. 

Jeli qoldanýshylary qartaıǵan shaǵynda taıanysh bolar balalarynan teperish kórip, dalada qalǵan Shý qalasy turǵynynyń muń-muqtajyn kópshilikke jetkizdi. Vıdeo avtory halyqtan keńes surap, aqsaqaldy bala-shaǵasy tastap ketkenin aıtty:

- Qarttar úıine barýǵa kelisesiz ǵoı?.. Bala-shaǵasy bar, biraq tastap ketken, - dedi vıdeo avtor bul jaıly.

Alaıda, aqsaqaldyń qarttar úıine qabyldanýy da túıitkili kóp másele bolyp shyqty. Óńirdegi qarttar úıi aqsaqaldy qabyldaýdan bas tartqan. Qazir aýdandyq ákimshilik aqsaqalǵa bolysyp, tıisti kómek kórsetip jatyr. Qarııanyń bolashaqta qaıda ornalasatyny Almatydan arnaıy shaqyrtylǵan týǵan perzenti kelgende belgili bolady deıdi mamandar.

 

"Adyrna" ulttyq portaly

 

 

Pikirler