بۇگىن ساعات 18.00-دە ۇگىت-ناسيحات كەزەڭىنىڭ باستالۋىمەن «AMANAT» پارتياسىنىڭ رەسپۋبليكالىق سايلاۋالدى شتابى ءوز جۇمىسىن باستادى.
ەرلان قوشانوۆ تىكەلەي ەفيردە «امANAT» پارتياسىنىڭ «حالىقپەن بىرگە!» دەپ اتالاتىن سايلاۋالدى باعدارلاماسىن جاريالادى.
ءىس-شاراعا پارتيالىق تىزىمگە ەنگەن كانديداتتار جانە پارتيانىڭ اتىنان ماجىلىسكە ۇسىنىلعان ءبىرمانداتتى ۇمىتكەرلەر، شتاب مۇشەلەرى، پارتيانىڭ «جاستار رۋحى» جاستار قاناتىنىڭ بەلسەندىلەرى، پارتيا جاقتاستارى قاتىستى.
«ءبىزدىڭ باعدارلاما – قوعامدا ابدەن قايناپ، ءپىسىپ-جەتىلگەن پروبلەمالاردى شەشۋدىڭ ناقتى جولى، ناقتى جوسپارى. وتكەن جىلدىڭ وزىندە پارتيا وڭىرلەردە، اۋىل-ايماقتا مىڭداعان كەزدەسۋ وتكىزىپ، تۇرعىنداردان 200 مىڭنان استام ۇسىنىس-پىكىر جيناعان بولاتىن. حالىقتى تولعاندىرعان ماسەلەلەردى مۇقيات تالداپ، جۇيەلەندىرە كەلە 10 نەگىزگى باعىتتان تۇراتىن قۇجاتتى ازىرلەدىك. ودان ءاربىر وتانداسىمىز ءوزى ءۇشىن وزەكتى ماسەلەلەردىڭ جاۋابىن تابا الادى»، – دەدى پارتيا توراعاسى.
ول ءار وبلىستىڭ، قالانىڭ دەموگرافيالىق، الەۋمەتتىك جانە ەكونوميكالىق ەرەكشەلىگىن ەسكەرە وتىرىپ، 20 ايماقتىق سايلاۋالدى باعدارلاما ازىرلەنگەنىن اتاپ ءوتتى. سونىمەن قاتار، ءبىرمانداتتى وكرۋگتەر بويىنشا سايلاۋعا قاتىساتىن پارتيانىڭ ءاربىر كانديداتى ءوزىنىڭ سايلاۋالدى باعدارلاماسىن ازىرلەدى.
ايتا كەتەيىك، شتاب قۇرامىنا پارتيانىڭ 486 بەلسەندى جاقتاسى كىردى. وڭىرلىك جانە اۋماقتىق 226 سايلاۋالدى شتابقا 7,5 مىڭعا جۋىق ادام جۇمىلدىرىلادى. سايلاۋشىلارمەن كەزدەسۋ كەستەسى دايىندالدى. بۇل جۇمىسقا كانديداتتاردىڭ 27 مىڭنان استام سەنىمدى وكىلى اتسالىسادى.
رەسپۋبليكالىق جانە 20 وڭىرلىك سايلاۋالدى باعدارلامانىڭ تولىق ماتىنىمەن، سونداي-اق «AMANAT» پارتياسىنان دەپۋتاتتىققا ۇسىنىلعان كانديداتتاردىڭ تىزىمىمەن جاقىندا ينتەرنەتتەن تانىسۋعا بولادى.
"ادىرنا" ۇلتتىق پورتالى
