باس اسكەري پروكۋراتۋرانىڭ مالىمەتىنشە، بۇگىنگى كۇنى بيلىكتى اسىرا پايدالانىپ، ءوزىن-ءوزى ولتىرۋگە دەيىن جەتكىزۋ بويىنشا كۇدىكتى رەتىندە تانىلعان اسكەري شەندى تەرگەۋگە ءتۇستى. قىلمىستىق ءىس قۇجاتتارىنا سايكەس ول ب.ميراشتى جانە ونىمەن بىرگە اسكەرگە شاقىرىلعان باسقا دا مەرزىمدى اسكەري قىزمەتكەرلەرگە پسيحولوگيالىق قىسىم كورسەتىپ، قورلاپ، جۇيەلى تۇردە سوققىعا جىققان.
كۇدىكتى قاماۋعا الىنىپ، تەرگەۋ جالعاسۋدا جانە ەرەكشە باقىلاۋعا الىنعان.
"تەرگەۋ بارىسىندا بولعان وقيعانىڭ بارلىق نۇسقالارى، سونىڭ ىشىندە جىنىستىق زورلىق-زومبىلىق مۇمكىندىگى تەكسەرىلدى. الايدا، بۇل دەرەك راستالماعان. ادۆوكاتتىڭ ءوتىنىشحاتتارى بەلگىلەنگەن مەرزىمدە قارالدى جانە قىلمىستىق ءىس جۇرگىزۋ زاڭناماسى تارتىبىمەن قاناعاتتاندىرىلدى."باس اسكەري پروكۋراتۋرانىڭ ءباسپاسوز قىزمەتى
ادۆوكات س. پراليەۆتىڭ قىلمىستىق ءىستىڭ ءمان-جايلارىن جاريالاۋ جونىندەگى ارەكەتتەرىنىڭ زاڭدىلىعىن ۋاكىلەتتى ورگان، ادۆوكاتتاردىڭ تارتىپتىك كوميسسياسى قارايدى.
قىلمىستىق-پروتسەستىك كودەكستىڭ 201-بابىنا سايكەس جەكە ومىرگە، جەكە جانە وتباسىلىق قۇپياعا قول سۇعىلماۋشىلىقتى ەسكەرە وتىرىپ، سوتقا دەيىنگى تەرگەپ-تەكسەرۋ جونىندەگى وزگە دە اقپارات جاريا ەتىلۋگە جاتپايدى.
"ادىرنا" ۇلتتىق پورتالى
