ءوز استاۋىنداعى ناپاقانى ءوز باۋىرلارىنا قيماعان جاركەنتتىك "جىگىتتەر" داۋ باستادى. ولار قالاعا كەلگەن وزگە ءوڭىردىڭ ازاماتتارىنا، ءوز باۋىرلارىنا، قوقان-لوقى كورسەتىپ، تاكسي قىزمەتىنە جولاماۋىن ەسكەرتتى. "جات جۇرتتىقتار" كولىگىنە جولاۋشى وتىرعىزىپ، الدا-جالدا اقشا تابا قالسا، قىزمەتىنىڭ سوڭى قانتوگىسكە ۇلاسۋى مۇمكىن ەكەندىگىن ەسكەرتتى، دەپ حابارلايدى "ادىرنا" ۇلتتىق پورتالى.
تاكسي قىزمەتىمەن كۇن كورىپ، جولاۋشى تاسىپ جۇرگەن جىگىتتەر ءوز استاۋىنان وزگەگە اس تاتىرعىسى كەلمەيدى. مۇنى جۋرناليست گۇلميرا ابىقاي حابارلادى:
جاركەتتىڭ جىگىتتەرى جينالىپ، الەۋمەتتىك جەلىگە ۆيدەو ۇندەۋ جاريالادى. بۇل ەسكەرتۋدەن گورى سەس كورسەتۋگە كوپ ۇقسايدى. “ەرتەڭ ءبىزدىڭ تاكسيگە جارماسساڭدار قانتوگىسكە دەيىن بارۋى مۇمكىن” دەگەندى قالاي تۇسىنەمىز؟سونداي-اق، جاركەنت ۆوكزالىندا دا دۇربەلەڭ. عيمارات ماڭىنىڭ ءبارى جەكە كاسىپكەرلەر يەلىگىندە. تەمىر جول بيلەتتەرىنىڭ قۇنىن ءوز قالاۋىنداعى باعامەن اسپانداتقان دەلدالدار كەسىرى جولاۋشىلارعا تيۋدە. وسىنداي باسسىزدىقتاردى باقىلايتىن جەرگىلىكتى اتقارۋشى ورگان قايدا @panfilov_akimdigi بارسىزدار ما؟جاركەنت - جەتىسۋ وبلىسى، پانفيلوۆ اۋدانىنىڭ ورتالىعى. 50 مىڭنان اسا تۇرعىنى بار كونە شاھار. ەلىمىزدىڭ وڭتۇستىك-شىعىسىندا قىتايمەن شەكارالاس “قورعاس” بەكەتى وسىندا.جەرگىلىكتى كولىگى باردىڭ ءبارى شەكارادان ءارلى-بەرلى وتكەن ساۋداگەرلەردى دىتتەگەن نۇكتەگە جەتكىزەتىن تاكسي قىزمەتىن اتقارادى. ەشقايسىندا رەسمي قۇجات جوق. جاركەنتتە باسقا جۇمىس تا جوق، - دەپ جازدى جۋرناليست.
زورايىپ، كۇشىنە مىنگەن جاركەنتتىك جۇرگىزۋشى جىگىتتەرگە قاتىستى جايتتىڭ ءمان-جايىن انىقتاعان پانفيلوۆ اۋدانى اكىمدىگى ءباسپاسوز حاتشىسى نۇربول قاناعاتۇلى ارنايى مالىمدەمە جاساپ، "كەشىرىم سۇراعان جىگىتتىڭ" ۆيدەوسىن جاريالادى.
"قازىر قورعاس بەكەتىندە ادام قاراسى كوپ. بەرى دە ارى دا ءوتىپ جاتقان جۇرگىنشى قانداستار سانى ارتۋدا. سول سەبەپتى جاركەنت قالاسىنىڭ ۆوكزال اۋماعىندا تاكسي قىزمەتى ءجۇرىپ تۇر. تۋىستارىن وزدەرى كۇتىپ العاي كەلگەن سىرتتاعى جۇرگىزۋشىلەرگە جەرگىلىكتى تاكسيستەر نانىمىزعا ورتاقتاستى دەپ نارازىلىق تانىتقان. ءتىپتى قان توگىلەدى دەپ ارتىق ايتقان بولاتىن. بۇگىن اۋداندىق پوليتسيا بولىمىنە جۇرگىزۋشى ازاماتتاردى شاقىرىپ، تۇسىندىرمە جۇمىستارى جۇرگىزىلدى. جىگىتتەر ايبىن مويىنداپ كەشىرىم ۆيدەوسىن جاريالادى", - دەدى ءباسپاسوز حاتشىسى.
كەشىرىم سۇراعان جىگىتتىڭ ايتار ءۋاجى مىنانداي:
- الەۋمەتتىك جەلىدە ەموتسيامىزعا بەرىلىپ، ءبىر بەينەجازبا جازىپ ەدىك. دۇرىس تۇسىنىڭىزدەر، ەشكىمدى ءبولىپ-جارىپ، ەشكىمگە جول بەرمەيمىز دەگەن ويىمىز جوق. بىراق ءوزىمىزدىڭ ويىمىزدى بىلدىرگىمىز كەلگەن. وسى مەنىڭ ءسوزىمدى جاركەتتىڭ بارلىق جىگىتتەرى قولدايدى، - دەدى ايىپتى ازامات.
دەگەنمەن، الەۋمەتتىك جەلىدە وقيعادان حاباردار بولعان قوعام بەلسەندىلەرى جىگىتتەردىڭ ىندىنىنا [قۇلقىنا] قاراپ، كارىنە ءمىندى. قازاقتىڭ قازاققا شاپتىققانىنا ىزالانعاننىڭ دەنى - جىگتىتتەر. ولار:
"قانتوگىس قولدايمىز!كەشىرىم قولدايمىز!بءىر اۋىزدان قولداي بەرەتىن سايلاۋشىلار سياقتى ەكەن";
"مىقتى بولساڭدار، قازاقتىڭ تاكسيلەرىنە وتىرمايتىن ۇيعىرلارعا ادام الالاماۋدى ۇيرەتىڭدەر. ءوز باۋىرلارىڭنىڭ جاعاسىنا جارماسپاي";
"رەسەيدىڭ تاكسي جۇيەسى، بۇكىل قازاقستاننىڭ ترانسپورتىن جالماپ وتىر،وعان بىردەڭە دەي المايدى.ءوز قازاعىنان ءوزى قىزعانىپ جۇرگەن ناداندار";
"كەشىرىم سۇراپ قانا كەتپەسىن. كەشىرىم سۇراعانى شۋ كوبەيگەسىن جاي عانا ايتا سالعانى. ويلارىنان قايتقان جوق ولار، تاعى دا بىلگەنىن ىستەيدى. بۇلار ادام قۇقىعىن بۇزۋشى كوشەنىڭ بانديتتارى. جىگىت ەمەس مىنالار، توناۋشى قىلمىسكەر جالماۋىزدار. 14 كۇن قاماپ، ايىپ-پۇل سالۋ كەرەك. ءبىر جەرلەرىن قىسىپ ءجۇرسىن، بولماسا قىستىرۋ كەرەك زاڭ بويىنشا. قاي زاماندا، قايدا ءومىر ءسۇرىپ جاتىرمىز.تاكسيدەن اقشا تاپپاسا اياعى مەن قولى تارتىلىپ قالعان جوق جۇمىس ىستەسىن وڭباعاندار";
"قان توگەم دەگەندى 14 كۇنمەن جابۋ كەرەك ەدى. سۇمىرەيىپ تۇرماعان ءتۇرىن قاراشى" دەپ جازىپ جاتىر.
"ادىرنا" ۇلتتىق پورتالى
