اقش مەملەكەتتىك حاتشىسى ەنتوني بلينكەننىڭ قازاق ەلىنە ات باسىن بۇرۋىنا قاتىستى شەتەلدىك بۇقارالىق اقپارات قۇرالدارى جارىسا جازىپ جاتىر. "France24" اقپارات اگەنتتىگىنىڭ جازۋىنشا، ەنتوني بلينكەن اقش-تىڭ ءرولىن ارتتىرۋعا باعىتتالعان ارنايى ساپارمەن قازاقستانعا كەلگەن. سەبەبى، رەسەيدىڭ ۋكرايناعا باسىپ كىرۋى قازاقستاندا دا ساياسي الاڭداۋشىلىق تۋدىرعان، دەپ جازدى "ادىرنا" ۇلتتىق پورتالى "France24"- كە سىلتەمە كورسەتە وتىرىپ.
اگەنتتىكتىڭ حابارلاۋىنشا، اقش-تىڭ جوعارى دارەجەلى ديپلوماتىن قازاق ەلىنىڭ شەنەۋنىكتەرى قاقاعان قىستىڭ قارا سۋىعىندا قارسى العان. ديپلومات استانادا پرەزيدەنت قاسىم-جومارت توقاەۆپەن كەزدەسىپ، كەيىن وزبەكستانعا ۇشادى.
سونىمەن قاتار، بلينكەن استانادا قىرعىزستان، تاجىكستان جانە تۇرىكمەنستان كىرەتىن ورتالىق ازياداعى بارلىق بەس رەسپۋبليكانىڭ سىرتقى ىستەر مينيسترلەرىمەن كەزدەسۋدى جوسپارلاپ وتىر.
وسى ورايدا شەتەلدىك بۇقارالىق اقپارات ارناسى رەسەي مەن ورتا ازيانىڭ قازىرگى ساياسي بايلانىسىن ىندەتە جازادى.
"ورتالىق ازيا ەلدەرى رەسەيمەن قاۋىپسىزدىك جانە ەكونوميكا سالاسىندا بۇرىننان بايلانىستا، بىراق ولداردىڭ بۇرىنعى كەڭەستىك بەلارۋس رەسپۋبليكاسىنان ايىرماشىلىعى بار. باستى ايىرماشىلىعى - ورتا ازيا مەملەكەتتەرىنىڭ سوعىس كەزىندە ماسكەۋدىڭ اينالاسىنا توپتانباۋى. ورتالىق ازيانىڭ بارلىق بەس مەملەكەتى وتكەن اپتادا رەسەي بيلىگىنىڭ ۋكراينادان كەتۋىن تالاپ ەتكەن بۇۇ باس اسسامبلەياسىنىڭ وتىرىسىندا داۋىس بەرۋدەن قالىس قالدى نەمەسە داۋىس بەرۋدەن قاشتى" - دەپ جازدى اقپارات ارناسى.
سونىمەن قاتار، اعىلشىن ءتىلدى اۋديتورياعا ورتا ازياداعى ورىستاردىڭ قىسىم كورىپ جاتقانى تۋرالى جالعان جەلەۋ دە بەلگىلى بولىپ شىقتى. ءپۋتيننىڭ امبەگە ايان سۇرقاي ساياساتى جايلى ولار:
"پرەزيدەنت ۆلاديمير ءپۋتيننىڭ ۋكرايناداعى ورىس تىلدىلەرگە دەگەن قارىم-قاتىناستى جالعان ايىپتاپ، سوعىس ءورتىن تۋدىرۋعا دەگەن سىلتاۋلارى ورىس دياسپوراسى تۇراتىن ورتالىق ازيا ەلدەرىنىڭ دە جۇيكەسىن توزدىردى", - دەيدى باسىلىم بۇل جايىندا.
باسىلىمنىڭ جازۋىنشا، ورتا ازيا - اقش، قىتاي، رەسەي اراسىندا تالاسقا تۇسەتىن باستى ايماق. باسىلىم قازاق ەلىنىڭ ديپلوماتيالىق ساياساتىن دا باعامداعان:
"قۇرلىقتا رەسەيمەن ەڭ ۇزىن قۇرلىق شەكاراسى بار مەملەكەت - قازاقستان. قازاقستان جاقىندا اسكەري قىزمەتتەن قاشقان رەسەيلىكتەردى قارسى الىپ، حالىقارالىق قۇقىق زاڭدىلىقتارىن ساقتادى. سوعىستى ديپلوماتيالىق باعىتتا رەتتەۋگە شاقىردى. جاقىندا توقاەۆ ۋكراينا پرەزيدەنتى ۆلاديمير زەلەنسكيمەن تەلەفون ارقىلى سويلەستى، دەگەنمەن پۋتينگە دە باردى", - دەپ جازادى بايقامپاز باسىلىم.
سونداي اق;
امەريكا قۇراما شتاتتارى ءوزىنىڭ ەڭ ماڭىزدى ءارى كۇشتى قارسىلاسى رەتىندە قاراستىراتىن قىتايدىڭ ساياساتىنا تويتارىس بەرۋدى كوزدەيدى. سوعان ساي قىتايمەن شەكارالاس ايماقتاردا ءوز ىقپالدى كەڭەيتۋگە تىرىسادى. پرەزيدەنت سي تسزينپين وتكەن جىلى Covid-19 پاندەمياسىنان كەيىنگى شەتەلگە شىققان العاشقى ساپارى ءۇشىن قازاقستان مەن وزبەكستاندى تاڭداعان ەدى - دەپ ءتۇيىنىن ايتادى.
ورايى كەلگەندە ايتا كەتەيىك، اقش مەملەكەتتىك حاتشىسى ەنتوني بلينكەن قازاقستانعا العاش رەت رەسمي ساپارمەن كەلدى. استانادا ونى توقاەۆ قابىلداپ، پرەمەر-ءمينيستردىڭ ورىنباسارى – قر سىرتقى ىستەر ءمينيسترى مۇحتار تىلەۋبەردى كەلىسسوزدەر جۇرگىزەدى.
سونداي-اق، استانادا بلينكەننىڭ قاتىسۋىمەن س5 + 1 فورماتىندا ورتالىق ازيا ەلدەرى مەن اقش سىرتقى ساياسي ۆەدومستۆولارى باسشىلارىنىڭ مينيسترلىك كەزدەسۋى وتەدى.
ورتالىق ازيادان كەيىن بلينكەننىڭ ساپارى نيۋ-دەليدە جالعاسادى.
"ادىرنا" ۇلتتىق پورتالى
