استانادا ونداعان انا كونگرەسس-حولل الدىنا جينالىپ، اكىمدىككە تالاپتارىن جەتكىزبەك بولدى. ولارعا قالا اكىمىنىڭ ورىنباسارى ەرمەك امانشاەۆ كەلىپ، ءتۇسىندىرۋ جۇمىستارىن جۇرگىزدى. امانشاەۆ ءار انا ءوزى تىركەلگەن اۋداننىڭ اكىمدىگىنە بارىپ، تالاپتارىن جازىپ، ارىز قالدىرۋعا بولاتىنىن ايتتى.
كونگرەسس-حولل الدىنا جينالعاندار 6 اقپاندا استانادا جيىن وتكىزىپ، بيلىككە تالاپ ايتقان انالاردى قۋدالاماۋدى سۇرادى. جيىنعا كەلگەن انا شولپان كالەنگارەەۆا الەۋمەتتىك جەلىگە ءوز تالاپتارىن ايتىپ، ۆيدەوۇندەۋ جاريالاعان سوڭ ۇيىنە پوليتسيا كەلگەنىن ايتتى.
كونگرەسس-حولل الدىنا كەلگەن پروكۋراتۋرا وكىلى بۇل شارانىڭ زاڭسىز ەكەنىن ەسكەرتتى. كەيىن جينالعان انالار وزدەرى تۇراتىن اۋداننىڭ اكىمدىكتەرىنە بارىپ، ارىز جازامىز دەپ تاراپ كەتتى.
6 اقپاندا استانادا انالار جينالىپ، وزدەرىنىڭ بيلىككە تالاپتارىن قويعان.ولارمەن كەزدەسۋگە بيلىك تاراپىنان استانا قالاسى اكىمىنىڭ ورىنباسارى ەرمەك امانشاەۆ شىققان. 8 اقپاندا الماتى، قىزىلوردا، اقتوبەدە ءبىر توپ انا اكىمدىككە بارىپ، بيلىككە بالاعا تولەنەتىن جاردەماقىنى كوبەيتۋ، كوپ بالالى وتباسىلاردى باسپانامەن قامتاماسىز ەتۋ جانە وزگە الەۋمەتتىك پروبلەمالاردى شەشۋدى تالاپ ەتكەن.
4 اقپانعا قاراعان ءتۇنى استانانىڭ كوكتال-1 شاعىن اۋدانىندا جەكە ءۇيدىڭ اۋلاسىنداعى ۋاقىتشا باسپانا ورتەنىپ، ءبىر وتباسىنداعى 2006, 2008, 2013, 2015 جانە 2018 جىلى تۋعان بەس قىز بالا وپات بولعان ەدى. وسى وقيعادان كەيىن كوپ بالالى انالار نارازىلىعى كۇشەيگەن.
6 اقپاندا قازاقستان ۇكىمەتى ەل ازاماتتارىنىڭ تابىسىن ارتتىرۋ جانە تۇرمىس ساپاسىن جاقسارتۋ، كوپبالالى وتباسىلارعا قولداۋ شارالارىن كۇشەيتۋ جونىندەگى جۇمىس توبى قۇرىلعانىن حابارلادى. يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك ءۇيى جوق كوپ بالالى وتباسىلارعا پاتەر سالۋعا قارجى ىزدەستىرىلىپ جاتقانىن ايتتى.
"ازاتتىق" راديوسى
