Astanada ondaǵan ana Kongress-holl aldyna jınalyp, ákimdikke talaptaryn jetkizbek boldy. Olarǵa qala ákiminiń orynbasary Ermek Amanshaev kelip, túsindirý jumystaryn júrgizdi. Amanshaev ár ana ózi tirkelgen aýdannyń ákimdigine baryp, talaptaryn jazyp, aryz qaldyrýǵa bolatynyn aıtty.
Kongress-holl aldyna jınalǵandar 6 aqpanda Astanada jıyn ótkizip, bılikke talap aıtqan analardy qýdalamaýdy surady. Jıynǵa kelgen ana Sholpan Kalengareeva áleýmettik jelige óz talaptaryn aıtyp, vıdeoúndeý jarııalaǵan soń úıine polıııa kelgenin aıtty.
Kongress-holl aldyna kelgen prokýratýra ókili bul sharanyń zańsyz ekenin eskertti. Keıin jınalǵan analar ózderi turatyn aýdannyń ákimdikterine baryp, aryz jazamyz dep tarap ketti.
6 aqpanda Astanada analar jınalyp, ózderiniń bılikke talaptaryn qoıǵan.Olarmen kezdesýge bılik tarapynan Astana qalasy ákiminiń orynbasary Ermek Amanshaev shyqqan. 8 aqpanda Almaty, Qyzylorda, Aqtóbede bir top ana ákimdikke baryp, bılikke balaǵa tólenetin járdemaqyny kóbeıtý, kóp balaly otbasylardy baspanamen qamtamasyz etý jáne ózge áleýmettik problemalardy sheshýdi talap etken.
4 aqpanǵa qaraǵan túni Astananyń Kóktal-1 shaǵyn aýdanynda jeke úıdiń aýlasyndaǵy ýaqytsha baspana órtenip, bir otbasyndaǵy 2006, 2008, 2013, 2015 jáne 2018 jyly týǵan bes qyz bala opat bolǵan edi. Osy oqıǵadan keıin kóp balaly analar narazylyǵy kúsheıgen.
6 aqpanda Qazaqstan úkimeti el azamattarynyń tabysyn arttyrý jáne turmys sapasyn jaqsartý, kópbalaly otbasylarǵa qoldaý sharalaryn kúsheıtý jónindegi jumys toby qurylǵanyn habarlady. Indýstrııa jáne ınfraqurylymdyq damý mınıstri Jeńis Qasymbek úıi joq kóp balaly otbasylarǵa páter salýǵa qarjy izdestirilip jatqanyn aıtty.
"Azattyq" radıosy
