15 اقپاندا استانا قالاسىنداعى كونتسەرت زالىنا جينالعان جۇزدەن استام ادام الەۋمەتتىك ماسەلەلەرىن ايتىپ، قالا اكىمىمەن كەزدەسۋدى تالاپ ەتتى.

شارادان تىكەلەي ەفيردە حابار تاراتقان ازاتتىق ءتىلشىسىنىڭ حابارلاۋىنشا، مۇندا بۇگىن اكىمدىك وكىلدەرى "اشىق ەسىك كۇنى" شاراسىن وتكىزبەك بولعان. بىراق وعان قالا اكىمى باقىت سۇلتانوۆ جانە ونىڭ ورىنباسارلارى كەلمەگەن. استانا قالالىق اكىمدىك وكىلدەرى ازاتتىق تىلشىسىنە تەك باسقارما جەتەكشىلەرىنىڭ كەلەتىنىن حابارلاعان.

جينالعان توپ كوپ بالالى انالارعا مەملەكەت تارابىنان جاردەمنىڭ ازدىعىن ايتىپ، جورگەكپۇلدى ءوسىرۋدى، باسپانا ماسەلەلەرىن شەشىپ بەرۋدى تالاپ ەتتى. ولار 6 اقپاندا بيلىك وكىلدەرىنە قويعان تالاپتارىنا دا جاۋاپ ەستىگىسى كەلەتىندەرىن ايتتى. زالدا بيلىك وكىلدەرىنە ءوتىنىش جازىپ تۇرعان كوپ بالالى انالاردىڭ ءبىرى ازاتتىق تىلشىسىنە وتباسىمەن بىرگە ەكى بولمەلى ۆرەميانكانى جالداپ تۇراتىنىن، بيلىكتەن باسپانا ماسەلەسىن شەشىپ بەرۋدى تالاپ ەتىپ وتىرعانىن ايتتى.

بۇگىن بۇعان ۇقساس شارالار قازاقستاننىڭ وزگە قالالارىندا وتەدى دەپ حابارلانعان. ازاتتىقتىڭ شىمكەنتتەگى ءتىلشىسى ديليارا يسانىڭ ايتۋىنشا، قازىر قالاداعى "تۇركىستان" سارايىنا مىڭنان استام ادام جينالعان. ولار قالا اكىمىمەن كەزدەسۋدى كۇتىپ وتىر.

استاناداعى انالار نارازىلىعى قازىر جالعاسىپ جاتىر. تىكەلەي ەفيردى مىنا جەردەن كورىڭىز:

4 اقپانعا قاراعان ءتۇنى استانانىڭ كوكتال-1 شاعىن اۋدانىندا جەكە ءۇيدىڭ اۋلاسىنداعى ۋاقىتشا باسپانا ورتەنىپ، ءبىر وتباسىنداعى 2006, 2008, 2013, 2015 جانە 2018 جىلى تۋعان بەس قىز بالا وپات بولعان ەدى.​ وسى وقيعادان كەيىن كوپ بالالى انالار نارازىلىعى كۇشەيگەن.

6 اقپاندا استانادا جۇزدەگەن انا جينالىپ، بيلىكتەن جاردەماقى مەن جورگەكپۇلدى ءوسىرۋدى، كوپ بالالى وتباسىلاردىڭ بالالارىنا تەگىن ءبىلىم بەرۋدى، انا مەن بالانى تەگىن ەمدەۋدى، باسپانا الۋدى جەڭىلدەتۋدى تالاپ ەتكەن. كەيىن استانالىق انالاردىڭ تالابىن باسقا ايماقتاعى ايەلدەر دە قولداعان.

6 اقپاندا قازاقستان پرەزيدەنتى نۇرسۇلتان نازارباەۆتىڭ حالىق تۇرمىسىن جاقسارتۋ ءۇشىن ۇكىمەتتە جۇمىس توبى قۇرىلعان. 12 اقپاندا ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا​ جۇمىس توبى اياسىندا كوپ بالالى انالاردى باسپانامەن قامتاماسىز ەتۋ ماسەلەسى قارالاتىنىن ايتتى.

"ازاتتىق" راديوسى