15 aqpanda Astana qalasyndaǧy konsert zalyna jinalǧan jüzden astam adam äleumettık mäselelerın aityp, qala äkımımen kezdesudı talap ettı.
Şaradan tıkelei efirde habar taratqan Azattyq tılşısınıŋ habarlauynşa, mūnda bügın äkımdık ökılderı "Aşyq esık künı" şarasyn ötkızbek bolǧan. Bıraq oǧan qala äkımı Baqyt Sūltanov jäne onyŋ orynbasarlary kelmegen. Astana qalalyq äkımdık ökılderı Azattyq tılşısıne tek basqarma jetekşılerınıŋ keletının habarlaǧan.
Jinalǧan top köp balaly analarǧa memleket tarabynan järdemnıŋ azdyǧyn aityp, jörgekpūldy ösırudı, baspana mäselelerın şeşıp berudı talap ettı. Olar 6 aqpanda bilık ökılderıne qoiǧan talaptaryna da jauap estıgısı keletınderın aitty. Zalda bilık ökılderıne ötınış jazyp tūrǧan köp balaly analardyŋ bırı Azattyq tılşısıne otbasymen bırge ekı bölmelı vremiankany jaldap tūratynyn, bilıkten baspana mäselesın şeşıp berudı talap etıp otyrǧanyn aitty.
Bügın būǧan ūqsas şaralar Qazaqstannyŋ özge qalalarynda ötedı dep habarlanǧan. Azattyqtyŋ Şymkenttegı tılşısı Diliara İsanyŋ aituynşa, qazır qaladaǧy "Türkıstan" saraiyna myŋnan astam adam jinalǧan. Olar qala äkımımen kezdesudı kütıp otyr.
Astanadaǧy analar narazylyǧy qazır jalǧasyp jatyr. Tıkelei efirdı myna jerden körıŋız:
4 aqpanǧa qaraǧan tünı Astananyŋ Köktal-1 şaǧyn audanynda jeke üidıŋ aulasyndaǧy uaqytşa baspana örtenıp, bır otbasyndaǧy 2006, 2008, 2013, 2015 jäne 2018 jyly tuǧan bes qyz bala opat bolǧan edı. Osy oqiǧadan keiın köp balaly analar narazylyǧy küşeigen.
6 aqpanda Astanada jüzdegen ana jinalyp, bilıkten järdemaqy men jörgekpūldy ösırudı, köp balaly otbasylardyŋ balalaryna tegın bılım berudı, ana men balany tegın emdeudı, baspana aludy jeŋıldetudı talap etken. Keiın astanalyq analardyŋ talabyn basqa aimaqtaǧy äielder de qoldaǧan.
6 aqpanda Qazaqstan prezidentı Nūrsūltan Nazarbaevtyŋ halyq tūrmysyn jaqsartu üşın ükımette jūmys toby qūrylǧan. 12 aqpanda eŋbek jäne halyqty äleumettık qorǧau ministrı Mädina Äbılqasymova jūmys toby aiasynda köp balaly analardy baspanamen qamtamasyz etu mäselesı qaralatynyn aitty.
"Azattyq" radiosy
