تاراز قالاسى بارىسحان تۇرعىن القابىندا №62 ورتا مەكتەپتىڭ اشىلۋ ءراسىمى ءوتتى. 600 ورىندىق جاڭا وقۋ ورداسىن پايدالانۋعا بەرۋ شاراسىنا جامبىل وبلىسىنىڭ اكىمى نۇرجان نۇرجىگىتوۆ قاتىسىپ، وقۋشىلار مەن مەكتەپ ۇجىمىن، وقۋشىلاردى قۋانىشىمەن قۇتتىقتادى.
-ءبىلىم بەرۋ ينفراقۇرىلىمىن دامىتۋ ءبىزدىڭ العا قويعان باستى مىندەتتەرىمىزدىڭ ءبىرى. بۇگىندە وبلىس مەكتەپتەرىنىڭ ماتەريالدىق-تەحنيكالىق بازاسى نىعايىپ، جاڭا مەكتەپتەر سوعىلىپ، اپاتتى، ءۇش اۋىسىمدى، ورىن تاپشىلىعى بار مەكتەپتەردىڭ ماسەلەسى رەت-رەتىمەن شەشىمىن تاۋىپ كەلەدى. بۇل ءوز كەزەگىندە ءبىلىم ساپاسىنىڭ ايتارلىقتاي وسۋىنە سەپتىگىن تيگىزەرى ءسوزسىز.
جامبىل وڭىرىنەن شىعىپ، بۇگىنگى كۇنى ءتۇرلى سالادا جەمىستى ەڭبەك ەتىپ، ەلىمىزدىڭ دامۋىنا ۇلەس قوسىپ جۇرگەن ازاماتتارىمىز از ەمەس.
سىزدەر دە سول اعا-اپكەلەرىڭىزدىڭ ءىزىن جالعاستىرىپ، بولاشاقتا مىقتى مامان بولىڭىزدار،-دەدى وبلىس اكىمى.
بۇدان سوڭ جاڭا نىساننىڭ لەنتاسى قيىلىپ، كىلتى تاپسىرىلدى. قوناقتار مەكتەپ ءىشىن ارالاپ كورىپ، كابينەتتەرىمەن تانىستى.
قۇرىلىسىن مەردىگەر «تاراز-يرريگاتسيا» جشس جۇرگىزگەن مەكتەپ 23 وقۋ بولمەسىمەن، كومپيۋتەر، موديفيكاتسيالىق، لينگافون كابينەتتەرىمەن، سپورت زال، شەبەرحانا، اسحانامەن قامتىلعان.
ايتا كەتەيىك، وتكەن جىلى وبلىستا 20 ءبىلىم نىسانىنىڭ قۇرىلىسىنا 7,0 ملرد. تەڭگە ءبولىنىپ، 8 مەكتەپ پايدالانۋعا بەرىلسە، اعىمداعى جىلى 12 نىساننىڭ قۇرىلىسى اياقتالادى.
سونداي-اق، «جايلى مەكتەپ» ۇلتتىق جوباسى اياسىندا وبلىستا 20 مەكتەپ سالىنادى. ونىڭ سەگىزىنىڭ قۇرىلىسى بيىل باستالسا، قالعانى كەلەر جىلعا جوسپارلانعان. تاراز قالاسىندا اعىمداعى جىلى ءتورت “جايلى مەكتەپتىڭ” قۇرىلىسى قولعا الىنادى.
