25 ناۋرىزدا قازاق عىلىمىنىڭ دامۋىنا ولشەۋسىز ۇلەس قوسقان عالىم، پروفەسسور، ە.ا.بوكەت اتىنداعى قاراعاندى ۋنيۆەرسيتەتىنە ەڭبەگى سىڭگەن قىزمەتكەر، فيزيكا-تەحنيكالىق فاكۋلتەتتىڭ نەگىزىن قالاۋشىلاردىڭ ءبىرى، قازاقستان رەسپۋبليكاسى پرەزيدەنتىنىڭ «قۇرمەت» وردەنىنىڭ يەگەرى، حح عاسىردىڭ عۇلاما ادامى، فيزيكا-ماتەماتيكا عىلىمدارىنىڭ دوكتورى، ۇلت جاناشىرى، رەسپۋبليكالىق QAZAQ CLUB-تىڭ قۇرمەتتى توراعاسى تەمىرعالي كوكەتاي اعامىز 85 جاسقا تولدى.
ۇلتتىق مۇددە دەگەندە جانىپ تۇسەتىن، وزىندىك ازاماتتىق ۇستانىمى دارا، ارۋاقىتتا پاراسات بيىگىنەن تابىلاتىن، جاستاردان اعالىق اقىلى مەن قولداۋىن ايامايتىن ەل جاقسىلارىنىڭ بىرەگەيى تەمىرعالي اعانىڭ ءبىتىم-بولمىسى ەرەك جان. تەمىرعالي كوكەتاي 1938 جىلى قازىرگى قاراعاندى وبلىسى، جەتكىنشەك اۋىلىندا دۇنيەگە كەلگەن. 1964 جىلى اباي اتىنداعى پەداگوگيكا ينستيتۋتىنىڭ فيزيكا-ماتەماتيكا فاكۋلتەتىن ءتامامداپ، ەستونيانىڭ تارتۋ ۋنيۆەرسيتەتىنە وقۋعا ءتۇستى. ال 1970 جىلى اتالعان جوعارى وقۋ ورنىندا ءجۇرىپ، دوكتورلىق ديسسەرتاتسيا قورعادى. عىلىمي جاڭالىق اشىپ سۋىق جارىق قۇبىلىسىن ويلاپ تاۋىپ، فيزيكا سالاسىندا وزىندىك ءىزىن قالدىردى. تەمىرعالي اعا تۇڭعىش قازاق فيزيگى، وكسفوردتا ءدارىس وقىعان العاشقى قازاق عالىمى. دۇنيەجۇزى عالىمدارىن بىلىمىمەن، اشقان عىلىمي جاڭالىعىمەن مويىنداتىپ، ۇلىبريتانياداعى حالىقارالىق بيوگرافيالىق ورتالىقتىڭ شەشىمىمەن دۇنيەجۇزى فيزيكتەرىنىڭ اراسىندا 1999 جىلى «حح عاسىردىڭ عۇلاما ادامى» اتانعان ازامات.
تەمىرعالي اعانىڭ عالىم رەتىندەگى جولى ءوز الدىنا، ءبىز ءۇشىن ونىڭ ەڭ ارداقتى قاسيەتى، ول ومىرلىك ۇستانىمى، ۇلت مۇددەسى دەگەندە جاي تاۋىپ وتىرا المايتىن، ۇلتتىق تاقىرىپ قوزعالعاندا ءوزىنىڭ پوزيتسياسىن اشىق، ەش بۇكپەسىز ايتاتىن ازاماتتىق قىرى ەرەكشە قىمبات. ول Qazaq club-تىڭ اياسىندا 2019-2022 جىلدارى تۇساۋى كەسىلگەن «ۇلت قۇندىلىقتارىن ساقتاۋ مەن ناسيحاتتاۋعا باعىتتالعان قازاق كۇنتىزبەسى»، «تاۋەلسىزدىك لەنتاسى»، «جاۋىنگەرلىك داڭق لەنتاسى» سىندى جوبالارعا ءوزىنىڭ اق باتاسىن بەرىپ، وسىناۋ بىرەگەي جوبالاردىڭ قازاق قوعامىندا ناسيحاتتالۋىنا ۇلەس قوسىپ كەلەدى. عالىمنىڭ تۋعان كۇنىنە وراي اكادەميك ە.بوكەت اتىنداعى قاراعاندى ۋنيۆەرسيتەتىندە فيزيكا-تەحنيكالىق فاكۋلتەتىنىڭ كەزەكتەن تىس كەڭەسىنىڭ وتىرىسى بولىپ ءوتتى. بۇل شاراعا الماتى، استانا، قاراعاندى قالالارىنان ەلىمىزگە بەلگىلى عالىمدار، جازۋشىلار، ەل ازاماتتارى مەن عالىمنىڭ شاكىرتتەرى، اتاپ ايتقاندا فيزيكا-ماتەماتيكا عىلىمدارىنىڭ دوكتورى، ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى ا.تۇرمۇحامبەت، جازۋشى ا.ساۋلەبەك، ونەرتانۋشى، ش.ايمان اتىنداعى «قازاقفيلم» كينوستۋدياسىنىڭ رەداكتورى ە.تولەۋتاي، فيلولوگيا عىلىمدارىنىڭ دوكتورى، پروفەسسور، اقىن ق.اسان، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ تەحنيكالىق فيزيكا كافەدراسىنىڭ زەرتتەۋشىسى د.قارگين، فيزيكا-ماتەماتيكا عىلىمدارىنىڭ دوكتورى، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى ت.نۇراحمەت، فيزيكا فاكۋلتەتىن 1977 جىلى العاش بىتىرگەن تۇلەكتەردىڭ اتىنان فيزيكا-ماتەماتيكا عىلىمدارىنىڭ كانديداتى ج.يسمايل، فيزيكا-ماتەماتيكا عىلىمدارىنىڭ دوكتورى، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى ق.كۇتەربەك، ءا.ساعىن اتىنداعى قاراعاندى تەحنيكالىق ۋنيۆەرسيتەتىنىڭ اعا وقىتۋشىسى ن.وشان، تەمىرعالي ءابىلداۇلىنىڭ شاكىرتى ل.ن.گۋميلەۆ اتىنداعى ەۇۋ-ءنىڭ تەحنيكالىق فيزيكا كافەدراسىنىڭ دوتسەنتى ع.ساعىندىقوۆا قاتىسىپ، تەمىرعالي اعاعا وزدەرىنىڭ جۇرەكجاردى تىلەكتەرىن ارناپ، جىردان شاشۋ شاشتى.
بۇل شاراعا رەسپۋبليكالىق «Qazaq club» مۇشەلەرى دە قاتىسىپ، ەل اعاسىنىڭ كەۋدەسىنە «تاۋەلسىزدىك توسبەلگىسىن» تاقتى. توسبەلگىدە كورىنىس تاپقان مودە قاعان، كەرەي مەن جانىبەك حانداردىڭ، ءۇش ءجۇزدى بىرىكتىرگەن ۇلى ابىلاي حاننىڭ، ەر كەنەسارى مەن ءاليحان بوكەيحاننىڭ ارۋاعى ەل اعاسىن قولداپ ءجۇرسىن دەمەكپىز. اعامىزدىڭ تۋعان كۇنىنە وراي ايتىلعان اق تىلەكتەرگە قوسىلا وتىرىپ، تەمىرعالي اعاعا زور دەنساۋلىق، شاڭىراعىنا باق-بەرەكە تىلەيمىز. ەلىمىزدىڭ عىلىم سالاسىنىڭ دامۋىنا ۇلكەن ۇلەس قوسقان ايماعىمىزدىڭ ابىز اقساقالىنىڭ عۇمىر جاسى ۇزاق بولىپ، قولىنان قامشىسى، ءوزى اتتان تۇسپەسىن!
قۇرمەتپەن، QAZAQ CLUB مۇشەلەرى: ن.سۇرشاۇلى، ا.حالەن، ە.قاجىبەك (تۇركيا) س.كەلدىباي، ە.ءابىلدين، ق.امانتاي، ە.يمانبەك، م.ىدىرىس، ج.شۋباي، س.ارالباي، E.كەڭەسبەك، ج.يسا، ن.وشان، د.اقىش، س.ەرشىمانۇلى، ن.كارىباي، ب.اقساقال، ن.سماعۇل، د.نۇركەيۇلى، د. ۇتجان، ا.سارسەكەي، A.شاتەك جانە ت.ب
"ادىرنا" ۇلتتىق پورتالى
