مەملەكەت باسشىسى قاسىم-جومارت توقاەۆ VIII سايلانعان قر پارلامەنتىنىڭ ءبىرىنشى سەسسياسىندا سويلەگەن سوزىندە ەكونوميكانى مونوپوليادان ارىلتۋ جۇمىستارىنا توقتالىپ ءوتتى، دەپ حابارلايدى “ادىرنا” ۇلتتىق پورتالى.
«ءىرى كاسىپورىندار جانە شيكىزات ەكسپورتىمەن اينالىساتىن كومپانيالار قازىناعا كوبىرەك تولەم تۇسىرسە، ادىلدىك بولار ەدى. بۇل – الەمدە بار وزىق تاجىريبە. قازىر ەلدەگى جاعداي تۇبەگەيلى وزگەردى. ادىلەتتى قازاقستان دەگەنىمىز – جالاڭ ۇران ەمەس، بۇل – انىق اقيقات. الدا اتقاراتىن جۇمىس كوپ. ءبىز بۇعان ءبىر ەل بولىپ تۇگەل اتسالىسۋىمىز كەرەك»، - دەدى قاسىم-جومارت توقاەۆ.
سونداي-اق، پرەزيدەنت وتكەن جىلدىڭ باسىنان بەرى ەكونوميكانى مونوپوليادان ارىلتۋ جۇمىستارى جۇرگىزىلىپ كەلە جاتقانىن ايتتى.
«بۇل – ۇكىمەتتەن ەرىك-جىگەر مەن جوعارى كاسىبيلىكتى تالاپ ەتەتىن كۇردەلى پروتسەسس. بۇل جۇمىستى جالعاستىرعان ءجون. ترانسفەرتتى باعا بەلگىلەۋ، حالىقارالىق سالىق سالۋ، سۋبسيديا مەن مەملەكەتتىك رەسۋرستاردى ءبولۋ كەزىندە باقىلاۋدى قامتاماسىز ەتەتىن تۇسىنىكتى جانە ءتيىمدى قۇرالداردى قولدانىسقا ەنگىزۋ قاجەت»، - دەدى مەملەكەت باسشىسى.
جالپى، ورتا جانە شاعىن كاسىپكەرلىكتى قولداۋ ساياساتى مەملەكەتىمىزدىڭ ۇزاق مەرزىمگە ارنالعان تۇراقتى ستراتەگياسىنا اينالۋى كەرەك.
«اق جول» پارتياسى شاعىن جانە ورتا بيزنەستى دامىتۋ، ەكونوميكانى مونوپوليادان ارىلتۋ تۋرالى ۇنەمى ايتىپ ءجۇر. پارتيانىڭ ماجىلىستەگى دەپۋتاتتارى وسى جۇمىسقا ءوز ۇلەسىن قوسادى دەپ سەنەمىن. سونداي-اق، كاسىپكەرلەردىڭ باستاماسىمەن قۇرىلعان Respublica پارتياسى پارلامەنتكە ءوتتى. بۇل ۇيىم بيزنەستىڭ دامۋىنا قولايلى جاعداي قالىپتاستىرۋعا اتسالىسادى دەپ ويلايمىن»، - دەدى پرەزيدەنت.
ايتا كەتەيىك، ەلوردادا VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسى اشىلدى. جيىنعا جاڭادان سايلانعان دەپۋتاتتار، مەملەكەتتىك ورگانداردىڭ باسشىلارى، ۇلتتىق قۇرىلتاي مۇشەلەرى، قوعام قايراتكەرلەرى قاتىسۋدا.
