شەجىرە كۇنى ۇلتتىق قۇندىلىقتار ۇلىقتالدى

16 ناۋرىز – شەجىرە كۇنى. شىمكەنت قالالىق ورىس دراما تەاترىنىڭ الدىنان باستالعان مەرەكەلىك ءىس-شارا اربات الاڭىندا جالعاستى. «شىمكەنت تسيرك» مەكەمەسى ۇيىمداستىرعان جيىنعا قالاداعى مادەنيەت مەكەمەلەرىنىڭ قىزمەتكەرلەرى قاتىسىپ، ۇلتىمىزدىڭ ءداستۇرىن دارىپتەپ، شەجىرەمىز بەن تاريحىمىزدان سىر شەرتتى. مەرەكەنى تاماشالاۋعا كەلگەن قالا تۇرعىندارى مەن قوناقتار ءال-فارابي بابامىزدان باستاپ، شىعىستىڭ شايىرلارى، ابىلايحاننىڭ ءداۋىرىن، قازاقتىڭ دومالاق اناسى مەن قىز جىبەگىن كورگەندەي بولدى. ۇلتتىق قۇندىلىقتارىمىزدى ۇلىقتاعان كوش اربات الاڭىن ءجۇرىپ ءوتتى. – ۇلىستىڭ ۇلى مەرەكەسى ناۋرىزدىڭ باستالعانى قالامىزدا ەرەكشە سەزىلىپ جاتىر. بۇگىنگى شەجىرە كۇنىن پايدالانىپ، ۇلىلاردىڭ كوشىن ۇيىمداستىردىق. ءار زاماننىڭ ءسان-سالتاناتىن كورسەتۋگە تىرىستىق. وسكەلەڭ ۇرپاق وتكەنىمەن، اتا-بابالارىمەن ماقتانۋى كەرەك، - دەيدى «شىمكەنت تسيرك» مەكەمەسىنىڭ باسشىسى نۇرلان ءادىلحانوۆ. ايتا كەتەيىك، شىمقالادا ناۋرىز مەرەكەسىن تويلاۋدىڭ ونكۇندىگى ءوتىپ جاتىر. شەجىرە كۇنى ەل-جۇرتتىڭ، جەتى اتانىڭ شەجىرەسى تارقاتىلىپ، تاريحىمىز دارىپتەلەدى. اربات الاڭىندا مەرەكەلىك شارالار كەشكە دەيىن جالعاسادى.