Şejıre künı ūlttyq qūndylyqtar ūlyqtaldy

16 nauryz – Şejıre künı. Şymkent qalalyq orys drama teatrynyŋ aldynan bastalǧan merekelık ıs-şara Arbat alaŋynda jalǧasty. «Şymkent sirk» mekemesı ūiymdastyrǧan jiynǧa qaladaǧy mädeniet mekemelerınıŋ qyzmetkerlerı qatysyp, ūltymyzdyŋ dästürın därıptep, şejıremız ben tarihymyzdan syr şerttı. Merekenı tamaşalauǧa kelgen qala tūrǧyndary men qonaqtar Äl-Farabi babamyzdan bastap, Şyǧystyŋ şaiyrlary, Abylaihannyŋ däuırın, qazaqtyŋ Domalaq anasy men Qyz Jıbegın körgendei boldy. Ūlttyq qūndylyqtarymyzdy ūlyqtaǧan köş Arbat alaŋyn jürıp öttı. – Ūlystyŋ ūly merekesı Nauryzdyŋ bastalǧany qalamyzda erekşe sezılıp jatyr. Bügıngı Şejıre künın paidalanyp, ūlylardyŋ köşın ūiymdastyrdyq. Är zamannyŋ sän-saltanatyn körsetuge tyrystyq. Öskeleŋ ūrpaq ötkenımen, ata-babalarymen maqtanuy kerek, - deidı «Şymkent sirk» mekemesınıŋ basşysy Nūrlan Ädılhanov. Aita keteiık, Şymqalada Nauryz merekesın toilaudyŋ onkündıgı ötıp jatyr. Şejıre künı el-jūrttyŋ, jetı atanyŋ şejıresı tarqatylyp, tarihymyz därıpteledı. Arbat alaŋynda merekelık şaralar keşke deiın jalǧasady.