رەسەيدىڭ فەدەرالدى قاۋىپسىزدىك قىزمەتى ساحالين ايماعىنداعى شەكارانى كەسىپ وتپەك بولعان رەسەيلىك تۇرعىندى تۇتقىندادى. وعان ۋكراينا مۇددەسى جولىندا ۇرىسقا اتتانىپ، "مەملەكەتكە ساتقىندىق جاسادى" دەگەن ايىپ تاعىلدى، دەپ حابارلايدى "ادىرنا" ۇلتتىق پورتالى.
ايماقتاعى شەكارا قىزمەتى ماماندارىنىڭ حابارلاۋىنشا, ساحاليندەگى شەكارادان وتپەك بولعان رەسەيلىك ازامات "مەملەكەتكە ساتقىندىق" جاساۋعا بەكىنگەن. تەرگەۋ بارىسىندا رەسەي تۇرعىنىنىڭ ۋكراينا جاعىنا شىعىپ، باسقىنشىلارعا قارسى سوعىسقا اتتانۋدى ماقسات ەتكەنى حابارلانادى.
"رەسەي فەدەراتسياسىنىڭ ساحالين وبلىسى بويىنشا شەكارا قىزمەتكەرلەرى ۋفسب-مەن بىرلەسە وتىرىپ ۋكراينا اۋماعىنا وتپەك بولعان ازاماتتى ۇستادى. ول رەسەي فەدەراتسياسى قارۋلى كۇشتەرىنە قارسى سوعىس قيمىلدارىنا قاتىسۋ ءۇشىن ۋكراين اسكەرىنىڭ قاتارىنا قوسىلعىسى كەلگەن", — دەپ حابارلايدى فسب.سونىمەن قاتار، شەكارا قىزمەتى "وتانىنا وپاسىزدىق جاساۋعا" وقتالعان رەسەيلىكتىڭ ترانزيت ادىسىمەن ءۇشىنشى ءبىر ەلگە شىعىپ، ۋكراينا توپىراعىنا تۇياق ىلىكتىرمەك بولعانىن مالىمدەدى. ونى تۇتقىنداۋ بارىسىن باياندايتىن ۆيدەودا ۇشاق تالونىنىڭ بولعانى دا كورسەتىلەدى.
"ادىرنا" ۇلتتىق پورتالى