تالدىقورعان قالالىق ءبىلىم ءبولىمىنىڭ باس ەسەپشىسى ءىرى كولەمدەگى اقشامەن ۇستالدى. وبلىستىق سىبايلاس جەمقورلىققا قارسى قىزمەت بۇل دەرەكتى راستادى، دەپ حابارلايدى “ادىرنا” ءتىلشىسى.
48 جاستاعى ايەل قوماقتى قارجىنى الىپ قاشپاق بولعان.
ءتىنتۋ كەزىندە ونىڭ ۇيىنەن 1 ميلليارد تەڭگەگە جۋىق اقشا تابىلدى، ونىڭ باسىم بولىگى شەتەل ۆاليۋتاسىمەن ساقتالعان. سونىمەن قاتار، ودان قۇجاتتار مەن جىلجىمايتىن مۇلىكتىڭ كىلتتەرى تاركىلەندى. ونىڭ ىشىندە 14 پاتەر، جەتى كوممەرتسيالىق ءۇي، 2020 جىلعى Toyota Land Cruiser جول تالعامايتىن كولىگى جانە زەرگەرلىك بۇيىمدار بار.
جەدەل-ىزدەستىرۋ ءىس-شارالارى بارىسىندا تالدىقورعانداعى ءبىلىم ءبولىمى قىزمەتكەرلەرىنىڭ مەملەكەتتىك بيۋدجەت قاراجاتىن ۇرلاۋى بىرنەشە جىل بويى تۇراقتى جالعاسقانى انىقتالدى. مەملەكەت قارجىسى وسى سالادا جۇمىس ىستەمەيتىن ازاماتتارعا ازىرلەنگەن سحەما بويىنشا اۋدارىلىپ وتىرعان.
قىلمىسكەرلەر ۇستالىپ، ۋاقىتشا ۇستاۋ يزولياتورىنا قامالدى. تەرگەۋ جالعاسۋدا.
