نازارباەۆ اۋلەتىنىڭ لوندوننىڭ قاق تورىندە اسپان تىرەگەن ۇيلەرىن جاپاتارماعاي ساتىپ جاتقانى انىقتالدى. Orda.kz جۋرناليستەرىنىڭ جۇرگىزگەن زەرتتەۋلەرىندە، نازارباەۆتاردىڭ لوندوندا، بەيكەر-cتريتتە، جەرى مەن بىرقاتار عيماراتتارى بولعانى ايتىلادى. كونان دويل شىعارماسىندا سۋرەتتەگەن شەرلوك حولمس پەن ۆاتسون دارىگەر شىنايى ومىردە بولسا، نازارباەۆتارمەن كورشى بولاتىن ەدى دەيدى شەندەستىرۋگە شەبەر جۋرناليستەر. بۇل جايلى "ادىرنا" ۇلتتىق پورتالى جازدى.
لوندونداعى ۇيلەر رەسمي تۇردە Fairmont Baker Street Limited كومپانياسىنىڭ اتىنا تىركەلگەن. بارلىعى كەزىندە 140 ميلليون فۋنت ستەرلينگكە ساتىپ الىنعان. دەگەنمەن، ءداۋىر ءبىتتى، داۋرەن كوشتى.
اعىلشىنداردىڭ استاناسىنداعى بەيكەر-ستريت 221ب مەكەنجايىندا ورنالاسقان مۇلىكتەردىڭ 90% پايىزى داريعا نازارباەۆاعا، 10% پايىزى ۇلى ءنۇرالي نازارباەۆتىڭ اتىندا ەكەندىگى جاسىرىن ەمەس. ولاردى رەسمي نازارباەۆتاردىڭ اتىنا تىركەۋ 2008-2011 جىلدار ارالىعىندا جۇرگەن. مۇنى ءساتتى جۇزەگە اسىرعان Farmont Baker Street, ءتىپتى، 2005 جىلى راحات اليەۆتىڭ قۇرمەتىنە لوندوننان جىلجىمايتىن مۇلىك العان.
Farmont Baker Street-ءتىڭ باسشىلىعىنا 2009 جىلى مۇحاممەد-ءالي قۇرمانباەۆ كەلەدى. ونىڭ مايشەلپەكتى اساۋىنا ءنۇرالى اليەۆتىڭ قاتىسى بار. سەبەبى، قۇرمانباەۆ 2007 جىلدان بەرى اليەۆتىڭ مۇددەسىنە جۇمىس ىستەگەن.
Orda.kz تىلشىلەرى Farmont Baker Street-ءتىڭ ەكى قۇرامداس كومپانياسى بار ەكەندىگىن انىقتادى (2016 جىلعا دەيىن). ولار - Dynamic Estates Ltd جانە Parkview Estates Ltd. اتالمىش كومپانيالار بەيكەر كوشەسىندەگى جىلجىمايتىن مۇلىكتى جانە حايگەيت اۋدانىنداعى ءۇيدى يەمەندەنگەن. 2009-2014 جىلدارى بارلىق ءۇش كومپانيانىڭ باسشىسى قۇرمانباەۆ بولعان.
مۇلىك ساتىلدى ما، ميراسقا قالدى ما؟
«ۆىحود ك موريۋ» تەلەگرام ارناسى قازاقستاننىڭ بۇرىنعى پرەزيدەنتىنىڭ تۇڭعىش قىزى داريعا نازارباەۆانىڭ لوندونداعى ءوز مۇلكىنىڭ "جوقتاۋىن اسىرعانىن" جازدى. جاريالانعان ماتىندە لوندونداعى بەيكەر كوشەسىندەگى بىرنەشە عيماراتتار، سونىڭ ىشىندە بەيكەر ستريت 221ب عيماراتى ءسوز بولادى.
دەرەكتەردى جىپكە تىزگەن اۆتورلار 2022 جىلى Farmont Baker Street-ءتىڭ زاڭدىق مەكەنجايى، تۇتاس دەرەكتەرى مەن قىزمەتتىك قۇرامى اۋىسقانىن باعامدادى. ەسكى ديرەكتورلاردىڭ بارلىعى جۇمىستان كەتىپ، ونىڭ ورنىنا جاڭا باسشىلىق كەلگەن. ولاردىڭ قاتارىندا شەتەلدىكتەر دە بار. ياعني، امەريكالىق جەكە مەنشىك يەلەرى دجوش باۋمگارتەن مەن ادام ءشۆارتستىڭ جارقىن ەسىمدەرى بيزنەس تىزىمىندە پايدا بولادى.
ءدال وسىنداي "قۇيتىرقى قۇبىلىستار" داريعا نازارباەۆانىڭ بەيكەر كوشەسىندەگى بيزنەسىمەن بايلانىستى ەكى كومپانيادا دا بولعان (Parkview Estates Management Ltd جانە Dynamic estates Ltd).
امەريكالىقتار كىم؟
"دجوش باۋمگارتەن پەن ادام شۆارتس - "اندجەلو گوردون" كومپانياسىنىڭ لوندون فيليالىنداعى ديرەكتورلارى. بۇل - ينۆەستيتسيالىق كومپانيا. كومپانيا ءوز سايتىندا، شامامەن، 5 53 ملرد ينۆەستيتسيالار پورتفەلىن ۋىسىندا ۇستايتىنىن مالىمدەيدى.
ينۆەستيتسيالار "زەينەتاقى قورلارىنىڭ، كورپوراتسيالاردىڭ، كوممەرتسيالىق ەمەس ۇيىمداردىڭ، تاۋەلسىز ءال-اۋقات قورلارىنىڭ جانە جەكە تۇلعالاردىڭ اتىنان", ياعني اقشاسى بار كەز كەلگەن ادامنىڭ تاراپىنان جاسالادى. قىزمەتتىڭ سيپاتتاماسىنا سۇيەنسەك، كومپانيانىڭ باسىمدىعى – كونسەرۆاتيۆتى ينۆەستيتسيالار، ونىڭ ىشىندە جىلجىمايتىن مۇلىك", - دەيدى باسىلىم.
اۆتورلاردىڭ كوڭىلىنە كۇدىك ۇيالاتقان ءبىر گاپ بار. گاپ - بەيكەر كوشەسىندەگى عيماراتتار Angelo Gordon كومپانياسىنا نەمەسە ونىڭ قۇرىلىمدارىنىڭ بىرىنە ەمەس، تىكەلەي مەنەدجەرلەر دجوش باۋمگارتەن جانە ادام شۆارتسقا جەكە تيەسىلى ەكەندىگىندە. سونىمەن قاتار، بارلىق مۇلىك ساتىپ العاننان كەيىن دجەرسيدە اشىلعان جاڭا Baker Melcombe Property Ltd كومپانياسىنا قايتا تىركەلىپ، قايتا جازىلعان.
"باسقا كومپانيالار ارقىلى سول Angelo Gordon مەنەدجەرلەرىنە جازىلعان تاعى بىرنەشە جىلجىمايتىن مۇلىك تابىلدى. بۇل جاي عانا كورپوراتسيانىڭ ىسكەرلىك تاجىريبەسى، تاريحى بولۋى مۇمكىن. بۇدان كۇدىكتەنە قويمايمىز. دەسە دە، دجوش باۋمگارتەن پەن ادام شۆارتس ءوزىنىڭ نەگىزگى كاسىبىمەن قاتار بىرنەشە قاۋىپتى بيزنەستى قاتار تىزگىندەۋى مۇمكىن. بۇل ۇيلەر سونىڭ جاڭعىرىعى ما؟.. تاعى ءبىر پايىم: ولار - داريعانىڭ نومينالدارى. ولار جىلجىمايتىن مۇلىكتى داريعانىڭ جەكە باس مۇددەسى ءۇشىن باسقارادى، - دەپ بولجايدى اۆتورلار.
ادەتتە، مۇنداي فيرمالار ساياسي تۇرعىسىز، تاعدىرى تايقىما ادامداردىڭ مۇلىكتەرىنە سيرەك اقشا قۇيادى. نازارباەۆتاردىڭ ۋىسىنان شىعىپ قالعان مۇنداي اكتيۆتەردىڭ ءوزى كۇماندى. ونىڭ ۇستىنە، بۇعان دەيىن ىقپالدى لەيبوريست مارگارەت حودج ۇلىبريتانيا پارلامەنتىندە قازاقستاندىق ەليتانىڭ "سىبايلاس جەمقورلىق جانە لاس اقشاسى" تۋرالى بايانداما جاساعان ەدى. ول لوندون بيلىگىن نازارباەۆتاردىڭ ەلىنەن اقشانى سىرتقا شىعارىپ، ءوز تۋىستارى جولىندا جەلگە شاشقانىنا كوز جۇمعانى ءۇشىن ايىپتاعانى ەسىمىزدە.
قولدا بار دەرەكتەرگە سايكەس، بارلىق كەشەندى الۋعا جاڭا يەلەر، اشىعى، امەريكالىق زەينەتكەرلەر £110 ملن تولەگەن. نازارباەۆتار مۇنى كەزىندە سوڭعى باعاسىنان $30 ملن ارتىق تولەپ، ساتىپ العان ەكەن...
"ادىرنا" ۇلتتىق پورتالى
