جامبىل وبلىسىندا ءوتىپ جاتقان «ZHEIF-2023» حالىقارالىق ەكونوميكالىق جانە ينۆەستيتسيالىق فورۋمى اياسىندا ونەركاسىپ باعىتى بويىشا قوناقتار شۋ اۋدانىنداعى «تاراز حيميالىق پاركى» ارنايى ەكونوميكالىق ايماعىندا باس قوسىپ، مۇنداعى ينۆەستيتسيالىق جوبالاردى دامىتۋ بويىنشا كەڭەس وتكىزدى.
وبلىس اكىمىنىڭ ءبىرىنشى ورىنباسارى نۇرجان كالەندەروۆتىڭ توراعالىعىمەن وتكەن جيىندا ەكونوميكالىق ايماققا تىركەلگەن جوبالاردىڭ اياق الىسى تۋرالى ايتىلىپ، قىزىعۋشىلىق بىلدىرگەن شەتەلدىك ينۆەستورلارعا ايماقتاعى ينفراقۇرىلىم بارىسى تانىستىرىلدى.
سونىمەن بىرگە، «تاراز حيميالىق پاركى» اەا باسقارما توراعاسى قايرات مۇقامبەتقاليەۆ الداعى ۋاقىتتا جۇزەگە اسىرىلاتىن بىرقاتار جوبالاردى اتاپ، ولارعا ەكونوميكالىق ايماق تاراپىنان كورسەتىلەتىن جەڭىلدىكتەرگە توقتالدى.
ال، «QazIndastry» اق بيزنەستى ىنتالاندىرۋ ديرەكتسياسىنىڭ باسشىسى ارىستانبەك ساعيەۆ ءوز بايانداماسىندا كاسىپ اشۋعا نيەتتى ينۆەستورلارعا مەملەكەت تاراپىنان كورسەتىلەتىن كومەكتەردىڭ جاي-جاپسارىن ءتۇسىندىردى.
«تاراز حيميالىق پاركى» ارنايى ەكونوميكالىق ايماعى زاماناۋي جوعارى ءونىمدى، باسەكەگە قابىلەتتى وندىرىستەردى جەدەل دامىتۋ، قىزمەت كورسەتۋدىڭ ساپالى جاڭا دەڭگەيىن قالىپتاستىرۋ، ينۆەستيتسيالار تارتۋ، ەكونوميكانىڭ باسىم سالالارى مەن وڭىرلەرگە جاڭا تەحنولوگيالاردى ەنگىزۋ، سونداي-اق حالىقتى جۇمىسپەن قامتۋدى ارتتىرۋ ماقساتىندا قۇرىلعان.
قازىرگى تاڭدا مۇندا جالپى قۇنى 249,7 ميلليارد تەڭگەنى قۇرايتىن 5 ينۆەستيتسيالىق جوبانى ىسكە اسىرۋ ءۇشىن 5 قاتىسۋشى تىركەلگەن. ولاردىڭ قاتارىندا گەوسينتەتيكالىق مەمبرانالار، ناتري ءتسيانيدى جانە فەرروسيليتسي ءوندىرۋ جوبالارى بار. وندا 2000 جاڭا جۇمىس ورنى قۇرىلادى دەپ جوسپارلانۋدا.
ءوز كەزەگىندە وبلىس اكىمىنىڭ ءبىرىنشى ورىنباسارى نۇرجان كالەندەروۆ «تاراز حيميالىق پاركى» اەا دايىن ينفراقۇرىلىمى بار ونەركاسىپتىك الاڭ ەكەنىن، وندا قاتىسۋشىلارعا سالىقتىق جانە كەدەندىك جەڭىلدىكتەر بەرىلەتىنىن اتاپ ءوتتى. سونداي-اق، ۆەنگريا مەن پاكىستان مەملەكەتتەرىنەن جانە ەلىمىزدىڭ وزگە دە وڭىرلەرىنەن كەلگەن ينۆەستورلارعا ەكونوميكالىق ايماقتىڭ قولايلى گەوگرافيالىق ورنالاسۋى، قوڭىرجاي كليماتى جانە كولىك-لوگيستيكالىق الەۋەتى قولايلى ەكەنىن جەتكىزدى.
- ءبىز ارنايى ەكونوميكالىق ايماق اۋماعىندا ءوز جوباسىن ىسكە اسىرۋدى جوسپارلاعان كەز كەلگەن ينۆەستورلارعا جاردەمدەسۋگە دايىنبىز. قازىرگى ۋاقىتتا ايماقتا قۋاتتىلىعى 600 مۆت جەل ەلەكتر ستانتسياسىن سالۋ جانە باسقا دا قاتىسۋشىلاردىڭ جوبالارىنا تومەندەتىلگەن باعا بويىنشا ەنەرگيا بەرۋ مىندەتتەمەسىن العان «تاس ماركەت» جشس جوباسىن ىسكە اسىرۋ جوسپارلانۋدا. بۇل ايماقتىڭ ينۆەستيتسيالىق الەۋەتىن ارتتىرۋعا ىقپال ەتەدى دەپ سانايمىن، - دەدى ن.كالەندەروۆ.
