كينوگەرلەر 12 مامىر كۇنى الماتى جانە استانا قالالارىندا ميتينگكە شىعۋعا بەل بۋىپ وتىر. بۇل تۋرالى ءماجىلىس دەپۋتاتى قازىبەك يسا Facebook پاراقشاسىندا ايتتى، دەپ حابارلايدى “ادىرنا” ۇلتتىق پورتالى.
“2023 جىلى ناۋرىزدا «ۇلتتىق كينونى قولداۋ مەملەكەتتىك ورتالىعى» وتكىزگەن كينوجوبالاردى ىرىكتەۋ كونكۋرسى كوپتەگەن زاڭبۇزۋشىلىقتارمەن وتكەندىگى بەلگىلى. بۇل تۋراسىندا باق-دا ءجيى جازىلىپ، الەۋمەتتىك جەلىلەردە دە جۇرتشىلىق قىزۋ تالقىلاپ، كوپتەگەن سىن پىكىرلەر بىلدىرۋدە. بۇل ماسەلەنى ءتىپتى، پارلامەنت مىنبەرىنەن «اق جول» فراكتسياسى مۇشەلەرى: قازىبەك يسا، ازات پەرۋاشەۆ، دانيا ەسپاەۆا، ەرلان بارلىباەۆ، ەرجان بەيسەنباەۆ، اسقار سادىقوۆ، «امانات» فراكتسياسى مۇشەسى ماقسات تولىقباي، «قحپ» فراكتسياسى مۇشەسى يرينا سميرنوۆا جانە مارحابات جايىمبەتوۆ سىندى ءماجىلىس دەپۋتاتتارى دا كوتەردى”،- دەپ جازدى دەپۋتات.
ءماجىلىس دەپۋتاتى قازىبەك يسانىڭ «ۇلتتىق كينونىڭ تاعدىرىن كىمدەرگە تاپسىرىپ وتىرمىز؟!» اتتى دەپۋتاتتىق ساۋالى قوعامداعى ۇلكەن تالقىلاۋعا ۇلاستى.
الايدا، مادەنيەت جانە سپورت مينيستىرلىگى مەن «ۇكقمو» باسشىلىعى اتالعان ماسەلەنى شەشۋگە مۇلدە قۇلىقسىزدىق تانىتىپ وتىر.
”كينوگەرلەر قاۋىمى «تاۋەلسىز كوميسسيا قۇرۋ ارقىلى كونكۋرستاعى زاڭبۇزۋشىلىقتاردى تەكسەرۋ» تۋرالى جالعىز-اق تالاپ قويىپ، ونى حات تۇرىندە قر پرەزيدەنتى ق.ك. توقاەۆقا، قر پرەمەر-مينيسترىنە، پرەزيدەنت اكىمشىلىگىنە، مادەنيەت جانە سپورت مينيسترلىگىنە جىبەرىپ، ارنايى بەينەۇندەۋ دە جولدادى. بىراق وسى ۋاققا دەيىن «ەستيتىن ۇكىمەت» كينوگەرلەر تالابىن نازاردان تىس قالدىرۋمەن كەلەدى. وسىعان بايلانىستى 27.04.2023 كۇنى كينوگەرلەر قاۋىمى «الماتى مەنەدجمەنت ۋنيۆەرسيتەتىندە» باس قوسىپ، ىرىكتەۋ كونكۋرسىندا ورىن العان زاڭبۇزۋشىلىقتاردى تالقىلاي كەلە، قر پرەزيدەنتى ق.ك.توقاەۆتىڭ اتىنا اشىق حات جولداۋ جونىندە شەشىمگە كەلدى.
اتالعان حات 03.05.2023 كۇنى «قازاقستان كينەماتوگرافيستەر وداعى» قب باسقارما توراعاسى ەرمەك تۇرسىنوۆتىڭ، «ۇلتتىق كينەماتوگرافيا ونەرى مەن عىلىمدارىنىڭ اكادەمياسى» قب پرەزيدەنتى راشيد نۇعمانوۆتىڭ جانە «قازاقستان انيماتسيالىق ستۋديالار قاۋىمداستىعى» زتب پرەزيدەنتى اداي ابەلدينوۆتىڭ اتىنان پرەزيدەنت اكىمشىلىگىنە جىبەرىلدى.
ايتسە دە، كينوگەرلەردىڭ بۇل جانايقايىنا «ەستيتىن ۇكىمەت» ءالى كۇنگە دەيىن نازار اۋدارار ەمەس. بۇل نەمقۇرايلىلىققا امالى تاۋسىلىپ، اشىنعان كينوگەرلەر 12.05.2023 كۇنى الماتى جانە استانا قالالارىندا ميتينگكە شىعۋعا بەل بۋىپ وتىر!”،- دەپ جازدى قازىبەك يسا.
