اقتاۋ مەن قالاعا جاقىن ماڭداعى اۋىل تۇرعىندارىن جىلۋ جانە گازبەن قامتاماسىز ەتۋگە ۇكىمەت رەزەرۆىنەن 3,7 ملرد تەڭگە بولىنەدى، دەپ حابارلايدى «ادىرنا» ءتىلشىسى پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
«ۇكىمەت «جاڭاوزەن – اقتاۋ» گاز قۇبىرىنان اۆتوماتتاندىرىلعان گاز تاراتۋ ستانساسى ورناتىلاتىن ماگيسترالدىق گاز قۇبىرى قۇرىلىسىن اياقتاۋ ءۇشىن ءوز رەزەرۆىنەن 3 ملرد 695 ملن 925 مىڭ تەڭگە بولەدى. پرەمەر-مينيستر ءاليحان سمايىلوۆ ءتيىستى قاۋلىعا قول قويدى.
بۇگىندە اقتاۋدىڭ سولتۇستىك بولىگى قارقىندى دامىپ كەلەدى. اتاپ ايتقاندا، كوپ قاباتتى تۇرعىن ۇيلەر مەن الەۋمەتتىك نىساندار قۇرىلىسى ءجۇرىپ جاتىر. بيىل قالانىڭ كەڭەيىپ كەلە جاتقان بولىگىن جىلۋمەن قامتۋ ماقساتىندا بىرقاتار بلوك-ءمودۋلدى قازاندىقتاردى ورناتۋ جانە ەكى جاڭا قازاندىق سالۋ جوسپارلانعان. جاڭا قۋات كوزدەرى گازبەن جۇمىس ىستەيتىن بولادى، وسىعان بايلانىستى ءتيىستى ينفراقۇرىلىمدى كەڭەيتۋ قاجەت»،—دەلىنگەن حابارلامادا.
ايتا كەتەيىك، جالپى ۇزىندىعى 52 شاقىرىم بولاتىن جاڭا گاز قۇبىرى اقتاۋ قالاسىنىڭ جاڭا شاعىن اۋداندارى، مۇنايلى اۋدانىنداعى قىزىلتوبە، داۋلەت، باياندى اۋىلدارى، سونداي-اق تۇپقاراعان اۋدانىنداعى اقشۇقىر مەن سايىن شاپاعاتوۆ اۋىلدارىنىڭ 150 مىڭعا جۋىق تۇرعىنىن جىلۋمەن جانە تاۋارلىق گازبەن قامتاماسىز ەتەدى.
جوبا قۇرىلىسى كاسپي ەنەرگەتيكالىق حابىنىڭ سىرتقى ينفراقۇرىلىمىن دامىتۋ اياسىندا جۇرگىزىلىپ جاتىر.
