Aqtau men qalaǧa jaqyn maŋdaǧy auyl tūrǧyndaryn jylu jäne gazben qamtamasyz etuge Ükımet rezervınen 3,7 mlrd teŋge bölınedı, dep habarlaidy «Adyrna» tılşısı Premer-ministrdıŋ baspasöz qyzmetıne sılteme jasap.
«Ükımet «Jaŋaözen – Aqtau» gaz qūbyrynan avtomattandyrylǧan gaz taratu stansasy ornatylatyn magistraldyq gaz qūbyry qūrylysyn aiaqtau üşın öz rezervınen 3 mlrd 695 mln 925 myŋ teŋge böledı. Premer-Ministr Älihan Smaiylov tiıstı qaulyǧa qol qoidy. Bügınde Aqtaudyŋ soltüstık bölıgı qarqyndy damyp keledı. Atap aitqanda, köp qabatty tūrǧyn üiler men äleumettık nysandar qūrylysy jürıp jatyr. Biyl qalanyŋ keŋeiıp kele jatqan bölıgın jylumen qamtu maqsatynda bırqatar blok-moduldı qazandyqtardy ornatu jäne ekı jaŋa qazandyq salu josparlanǧan. Jaŋa quat közderı gazben jūmys ısteitın bolady, osyǧan bailanysty tiıstı infraqūrylymdy keŋeitu qajet»,—delıngen habarlamada.Aita keteiık, jalpy ūzyndyǧy 52 şaqyrym bolatyn jaŋa gaz qūbyry Aqtau qalasynyŋ jaŋa şaǧyn audandary, Mūnaily audanyndaǧy Qyzyltöbe, Däulet, Baiandy auyldary, sondai-aq Tüpqaraǧan audanyndaǧy Aqşūqyr men Saiyn Şapaǧatov auyldarynyŋ 150 myŋǧa juyq tūrǧynyn jylumen jäne tauarlyq gazben qamtamasyz etedı. Joba qūrylysy Kaspii energetikalyq habynyŋ syrtqy infraqūrylymyn damytu aiasynda jürgızılıp jatyr.
