الماتى وبلىسى تالعار اۋدانى جاڭالىق اۋىلىنداعى رەپرەسسيا قۇرباندارى مۋزەي كەشەنىنىڭ اۋماعىندا الاشوردا قايراتكەرى احمەت مامەتوۆكە ەسكەرتكىش بەلگى قويىلدى. بۇل تۋرالى ادەبيەتتانۋشى-عالىم ماقسات ءتاج-مۇرات ايتتى، دەپ حابارلايدى «ادىرنا» ءتىلشىسى.
«بەلگى تاستى قويۋ 7 مامىر، وتان قورعاۋشىلار كۇنىنە سايكەس كەلدى. احاڭ زامانىندا اسكەردە بولماعان، الايدا وتانىن قالامىمەن، دارىگەرلىك قىزمەتىمەن جانە مانشۇكتەي باتىر قىزىمىزدى تاربيەلەۋىمەن قورعادى. جاڭالىق اۋىلىنداعى ءىلياس جانسۇگىروۆ اتىنداعى № 37 مەكتەپ وقۋشىلارىنىڭ اسكەري كيىممەن ساپ تۇزەپ كەپ اتالارىنا قۇرمەت كورسەتۋىنىڭ وسىنداي سيمۆولدىق ءمانى بولدى.
ولارمەن بىرگە ەسكەرتكىش اشۋ راسىمىنە احاڭنىڭ ءبىر تۋعان ءىنىسى قاناتتىڭ قىزدارى —شولپان، مارجان، ايمان جانە ساۋلەدەن تاراعان ۇرپاق قاتىستى. سول ءتورت قىزدان بۇگىندە كوزى ءتىرى شولپان اپاي بەلگى قويۋ ءراسىمىن اشىپ، ءسوز سويلەدى»،- دەدى ول.
ايتا كەتەيىك، احمەت مامەتوۆ (احمەدعالي مامىتۇلى) – اعارتۋشى، اقىن، جۋرناليست، دارىگەر. ونىڭ “كەڭەس”، “عيبرات” اتتى ولەڭ جيناقتارى بار. قايراتكەر 1917 — 1918 جىلدارى “بىرلىك تۋى” (تاشكەنت), “ويىل ءۋالاياتى” گازەتتەرىندە، ورال وبلىسى زەمستۆو باسقارماسىندا جۇمىس ىستەدى.
1920 جىلى ورال گۋبرەۆكومىنىڭ ۇگىت-ناسيحات جانە جىمپيتى ۋەزدىك رەۆكومىنىڭ حالىق اعارتۋ بولىمدەرىندە قىزمەت اتقاردى. 1927 — 1929 جىلدارى ماڭعىستاۋ، سەمەي وڭىرلەرىندە دارىگەر، ال 1930 جىلى الماتى قالاسىندا قازاق تەرى جانە جۇقپالى اۋرۋلار عىلىمي-زەرتتەۋ ينستيتۋتىنىڭ العاشقى ديرەكتورى بولدى. 1937 جىلى تۇتقىندالىپ، اتۋ جازاسىنا كەسىلدى.
مامەتوۆتىڭ اعاسىنان اسىراپ العان قىزى مانشۇك مامەتوۆا شىعىس قىزدارى اراسىنان تۇڭعىش رەت كەڭەس وداعىنىڭ باتىرى اتاعىن العان بولاتىن.
