Almaty oblysy Talǵar aýdany Jańalyq aýylyndaǵy repressııa qurbandary mýzeı kesheniniń aýmaǵynda Alashorda qaıratkeri Ahmet Mámetovke eskertkish belgi qoıyldy. Bul týraly ádebıettanýshy-ǵalym Maqsat Táj-Murat aıtty, dep habarlaıdy «Adyrna» tilshisi.
«Belgi tasty qoıý 7 mamyr, Otan qorǵaýshylar kúnine sáıkes keldi. Ahań zamanynda áskerde bolmaǵan, alaıda Otanyn qalamymen, dárigerlik qyzmetimen jáne Mánshúkteı batyr qyzymyzdy tárbıeleýimen qorǵady. Jańalyq aýylyndaǵy Ilııas Jansúgirov atyndaǵy № 37 mektep oqýshylarynyń áskerı kıimmen sap túzep kep atalaryna qurmet kórsetýiniń osyndaı sımvoldyq máni boldy.
Olarmen birge eskertkish ashý rásimine Ahańnyń bir týǵan inisi Qanattyń qyzdary —Sholpan, Marjan, Aıman jáne Sáýleden taraǵan urpaq qatysty. Sol tórt qyzdan búginde kózi tiri Sholpan apaı belgi qoıý rásimin ashyp, sóz sóıledi»,- dedi ol.
Aıta keteıik, Ahmet Mámetov (Ahmedǵalı Mamytuly) – aǵartýshy, aqyn, jýrnalıst, dáriger. Onyń “Keńes”, “Ǵıbrat” atty óleń jınaqtary bar. Qaıratker 1917 — 1918 jyldary “Birlik týy” (Tashkent), “Oıyl ýálaıaty” gazetterinde, Oral oblysy zemstvo basqarmasynda jumys istedi.
1920 jyly Oral gýbrevkomynyń úgit-nasıhat jáne Jympıty ýezdik revkomynyń halyq aǵartý bólimderinde qyzmet atqardy. 1927 — 1929 jyldary Mańǵystaý, Semeı óńirlerinde dáriger, al 1930 jyly Almaty qalasynda Qazaq teri jáne juqpaly aýrýlar ǵylymı-zertteý ınstıtýtynyń alǵashqy dırektory boldy. 1937 jyly tutqyndalyp, atý jazasyna kesildi.
Mámetovtiń aǵasynan asyrap alǵan qyzy Mánshúk Mámetova shyǵys qyzdary arasynan tuńǵysh ret Keńes Odaǵynyń Batyry ataǵyn alǵan bolatyn.
