Ulylardy ulyqtaý ma, álde mazaqtaý ma?

9531
Adyrna.kz Telegram

Kúni keshe áleýmettik jelide Almaty oblysy, Balqash aýdany, Baqanas aýylynda Dinmuhamed Qonaevqa arnap qoıylǵan eskertkishtiń sýreti qoǵam narazylyǵyn týdyrdy.

Jeli qoldanýshylary bul týyndyǵa qatysty «Músin jasaýda baıqaý jarııalaýǵa bolmas pa edi? Mektep oqýshysynyń plastılınnen jasaı salǵan shatpaǵyna uqsaıdy», «Proporııalary saqtalmaǵan», «Mynany qoıýǵa kim ruqsat bergen?» degen pikirlerdi jarysa jazýda.

Belgili músinshi Oljas Muhamedı Facebook jelisindegi resmı paraqshasynda týyndyny tender men para eskertkishine teńedi.

«Qazaqstandaǵy eskertkishter men músinder máselesin kópten beri kóterip kelemin. Alaıda búgingi jaǵdaı barlyǵyna unaıtyn sekildi.
Múmkin prezıdent bul jaǵdaıǵa nazar aýdarar. Men 60 adamnan turatyn músinshiler tobynyń atynan óz usynysymdy berýge qýanatyn edim»,-dedi ol.

Almaty oblysy ákimdiginiń málimeti boıynsha, tarıhı tulǵanyń músini jeke qoldaýshylardyń qarjysymen ornatylǵan.

Aıta keteıik, bul qoǵam talqysyna túsken alǵashqy tarıhı-mádenı mura emes.

Buǵan deıin Óskemendegi Abaı men Mıhaelısti mazaq etken eskertkish halyqtyń dúrligýi nátıjesinde aldyrtylǵan bolatyn. Músinshi Abaı atamyzdyń tulǵasyn ergejeıli etip beınelep, orys zertteýshisi Mıhaelıspen «selfı» jasap turǵandaı kórsetken.

Abaı jáne Mıhaelıs

2019 jyly Semeı qalasyndaǵy Jeńis saıabaǵynda ornatylǵan Mánshúk Mámetovanyń aǵashtan jasalǵan músini biraz adamdy shoshytty. Keıbireýler týyndyny mystan kempirge uqsatyp, batyr qyzdy qorlaýdy toqtatýdy talap etken edi.

Mánshúk Mámetova

Sondaı-aq, Qyzylorda kósheleriniń birine qoıylǵan qazaq qyzynyń eskertkishi, Jezqazǵandaǵy Abaı músini de kópshiliktiń kóńilinen shyqpady.

Ókinishke qaraı, elimizdegi eskertkishter tóńireginde daý kóp. Búginde ulylardy ulyqtaýdyń ornyna, olardyń beınelerin mazaq etýdi ádetke aınaldyrǵandaımyz. Bizdiń taraptan aıtarymyz — halqymyzdyń ótkeni men búginin baılanystyratyn mádenı eskertkishterdiń ulttyq ıdeologııa qalyptastyrý jolyndaǵy negizgi qural ekenin umytpasaq eken degen tilek qana...

Dıana ASAN,

«Adyrna» ulttyq portaly

Pikirler