قر حالقىنىڭ اتىنان:
رەسپۋبليكا باسشىلىعىنا!
قر پارلامەنت دەپۋتاتتارىنىڭ نازارىنا!
باق نازارىنا!
مۇنداعى كوتەرىلەتىن ماسەلە باياناۋلداعى باتىر اتالارىمىز - سالىناتىن ەسكەرتكىش تۋرالى بولماق. ەسكەرتكىشتى سالۋ كەرەك، بىراق، ءوڭىردىڭ تۋماسى/تۇرعىنى رەتىندە ءبىرشاما اقپاراتقا سۇيەنىپ، سوعان بولىنگەن قارجى تۋرالى وي-پىكىرىمدى ايتپاقپىن.
ءبىرىنشى ايتپاعىم، شىعىندالۋى ءتيىس 1 ملارتدان استام تەڭگە بۇل تاپ-تازا ىسىراپ. ەلگە تانىمال ارمان شوراەۆ اتتى كاسىپكەر - قوعام بەلسەندىسىنىڭ، استانا اكىمى كۇلگىنوۆتىڭ 92 ملردقا ءبىر كوشەنى جوندەۋگە بولگەن اقشاسىنا 160 شارشى م-دەن تۇراتىن 5 مىڭ تۇرعىن ءۇي، 10 بالاباقشا، 3 مەكتەپ، 2 پوليكلينيكا، ارينە، بارلىق كوممۋنيكاتسيالارىمەن، ياعني شاعىن قالاشىق سالۋعا بولاتىنىن ەسەپتەگەن ۆيدەوسىن كوبىمىز كوردىك. «ءوزىمىزدىڭ» باكاۋوۆ كەزىندە 36 مىڭ تۇراتىن باتارەيالاردى 336 مىڭعا ساتىپ العانىن دا بىلەمىز.
بۇل دا ءدال وسى جاعدايلار سياقتى. كەشە عانا كەرەكۋدە سالىنعان ابايدىڭ ەسكەرتكىشىنە 55 ملن تەڭگە قاراجات كەتىپتى (ونىڭ وزىندە ءوز قۇنى وسىلاي ما ەكەن، مۇنى دا بىزگە اكىمدىك راسشيفروۆكاسىمەن جەتكىزبەيدى). ەكى باتىرعا 100 ملن تەڭگە دە كەتپەس، ويتكەنى استىنداعى تاسى ءبىر، دايىندالاتىن جەرى ءبىر دەگەن سياقتى. سالىناتىن جەرى دەمەكشى ول ساز، تۇزدى سور سول جەرگە جوبادا كورسەتىلگەندەي، اينالاسىنا اعاشتار ەگۋ ءۇشىن، توپىراعىن اۋىستىرۋ قاجەت. قارجىنىڭ كوپ بولىگى سوعان كەتپەكشى. نەگە ەسكەرتكىشتى قاراعاندىعا، جاسىبايعا ءوتىپ بارا جاتقانداردىڭ دا (جازدا مىڭداعان دەمالۋشىلار كەلەدى) كورۋى ءۇشىن باياننىڭ كىرە بەرىس جاعىندا ورنالاستىرماسقا؟ سوندا توپىراق اۋىستىرۋ قاجەتى دە بولماۋشى ەدى.
ەكىنشىدەن، باياناۋىلداعى 40 جىل تۇرعان، تۇرعىندارعا استاناداعى بايتەرەكتەي بولىپ كەتكەن، 2 رەت كۇردەلى جوندەۋدەن وتكەن (سوڭعىسىنا كوپ بولعان جوق) ستەللانى باسقاعا اۋىستىرماقشى. باقانداي جارتى ميللياردقا جۋىق تەڭگەگە؟!
وسى ۋاقىتتا باياناۋىلدىڭ ءوزى ءالى كاناليزاتسيا، ونى تازارتۋ جۇيەسىنسىز وتىر. ۇلكەن اۋىلدىڭ ءناجىس سۋلارى كول جاققا اعارى بەلگىلى . سوڭىرا لايلانعان كولدەرگە كىم بارار؟ باياننىڭ سۋ جۇيەسىنسىز وتىرعان 9 اۋىلى بار. ولاردىڭ ارقايسىسىنا سونى تارتۋ ءۇشىن ورتاشا 200 ميلليون تەڭگە كەتەدى ەكەن. ءبىرشاما اۋىلداردىڭ اراسىندا 30 جىلدا ءبىر رەت تە جول سالىنباعان. ايتا بەرسە شىعا بەرەتىنى ءسوزسىز!
شەكتەن شىعىپ جاتقان ينفلياتسيانى قاپەرگە الماي (بۇعان دا بيلىكتىڭ كىناسى جوق دەپ كىم ايتادى؟), ناتيجەسىندە پاندەميا كەزىندە ودان ارمەن تابىستارى ازايىپ جاتقان اۋىل جۇرتىنا ەمەس، تۋريستىك تابىس كوزىن بۇعاتتاۋى مۇمكىن ەكولوگياعا ەمەس، مادەنيەتكە ءبولىپتى وراسان زور قارجىنى. بىراق وسى سالادا دا ءتيىمدى پايدالانۋعا بولادىعوي، اقىرى بولىنگەن سوڭ؟ قايدا، قايدا؟ بىراق ءدال باياناۋىلدا ولكەتانۋ مۋزەيى نەگە جوق؟ سوسىن بۇل اۋداندا باسقا دا وسى سالاعا قارجى ءبولىنۋى ءتيىس وبەكتىلەر جەتكىلىكتى بولار؟
سوڭعى 2 ابزاتستا كورسەتىلگەن وبەكتەردىڭ از ەمەس بولىگىن (اۋدان تۇرعىندارىمەن كەلىسە وتىرا), وسى ەكى باتىرعا ارنالعان ەسكەرتكىشپەن قاتار سالۋعا بولاتىنى كورىنىپ تۇر.
بىراق سكاكوۆ باستاعان اكىمدىك 1,5 ميلليارد تەڭگەنى تەك ەكى باتىرعا ءبىر ەسكەرتكىش جانە ستەللانى ايىرباستاۋعا عانا جۇمسايىن دەپ وتىر....
قالايشا وسىلاي شەشىلىپ وتىر؟ الدە جارتىسىنا جۋىق دەمەۋشىلەردىڭ اقشالارى (ولار كوبىنە سۇراۋسىز بولادى), تۋرا سۇراعاندا، «راسپيلدىڭ» كوزى مە؟ تەندەردەن بولاتىن جەمقورلىقتاردى دا ءبىزدىڭ وڭىردە ەشكىم الىپ تاستاماعان شىعار؟ بۇنى سىزدەردەن سۇراپ وتىرمىن، سكاكوۆ مىرزا؟
ءسوز سوڭىندا وسى 1,5 ميلليارد اقشانىڭ (بۇل ءبىزدىڭ، سالىق تولەۋشىلەردىڭ قارجىلارى. جانە دەمەۋشىلەردىڭ دە اقشاسى، قازاقتىڭ بايلىعى، حالىقتىڭ جۇمىس كۇشى ارقىلى قۇرالاتىنى ءمالىم) قايدا كەتىپ جاتقانىن تيىنىنا دەيىن حالىق الدىندا ەسەپ بەرۋىڭىزدى تالاپ ەتەمىز! وڭىردەگى دەپۋتاتتاردىڭ دا قالاي سايلاناتىنىن بىلەمىز. كوبىنە اكىمدىكتىڭ قالاۋىمەن سايلانادى. سوندىقتان ولاردىڭ كەلىسۋىن حالىقتىڭ كەلىسۋى دەپ ەسەپتەمەيمىز، سكاكوۆ مىرزا!
جالپى، جەر-جەردەگى بارلىق اكىمدەر حالىقتىڭ اقشاسىن الداعى جىلدىڭ بيۋدجەتىنە قوياردىڭ الدىندا بارلىق رەسپۋبليكالىق، جەرگىلىكتى باقتارعا جازىپ، حالىقتىڭ تىكەلەي تالقىلاۋىنان تاۋەلسىز حالىق ءوزى سەنەتىن/سايلايتىن ەكسپەرتتەردىڭ ساراپتاماسىنان وتكىزگەننەن كەيىن عانا قويىلۋ ينستيتۋتى قالىپتاسۋى كەرەك. سوندا جەمقورلىقتىڭ كۇرت ازايۋى دا ءسوزسىز.
رۋزا بەيسەنبايتەگى،
قوعام بەلسەندىسءى
"ادىرنا" ۇلتتىق پورتالى
