Jemqorlyq? Eki batyrdyń eskertkishine mıllıard teńge bólgenine qoǵam belsendisi qarsy

3503
Adyrna.kz Telegram

QR halqynyń atynan:

Respýblıka basshylyǵyna!
QR Parlament depýtattarynyń nazaryna!
BAQ nazaryna!

Mundaǵy kóteriletin másele Baıanaýldaǵy batyr atalarymyz -  salynatyn eskertkish týraly bolmaq. Eskertkishti salý kerek, biraq, óńirdiń týmasy/turǵyny retinde birshama aqparatqa súıenip, soǵan bólingen qarjy týraly oı-pikirimdi aıtpaqpyn.
Birinshi aıtpaǵym, shyǵyndalýy tıis 1 mlartdan astam teńge bul tap-taza ysyrap. Elge tanymal Arman Shoraev atty kásipker - qoǵam belsendisiniń, Astana ákimi Kúlginovtyń 92 mlrdqa bir kósheni jóndeýge bólgen aqshasyna 160 sharshy m-den turatyn 5 myń turǵyn úı, 10 balabaqsha, 3 mektep, 2 polıklınıka, árıne, barlyq kommýnıkaııalarymen, ıaǵnı shaǵyn qalashyq salýǵa bolatynyn eseptegen vıdeosyn kóbimiz kórdik. «Ózimizdiń» Bakaýov kezinde 36 myń turatyn batareıalardy 336 myńǵa satyp alǵanyn da bilemiz.
Bul da dál osy jaǵdaılar sııaqty. Keshe ǵana Kerekýde salynǵan Abaıdyń eskertkishine 55 mln teńge qarajat ketipti (onyń ózinde óz quny osylaı ma eken, muny da bizge ákimdik rasshıfrovkasymen jetkizbeıdi). Eki batyrǵa 100 mln teńge de ketpes, óıtkeni astyndaǵy tasy bir, daıyndalatyn jeri bir degen sııaqty. Salynatyn jeri demekshi ol saz, tuzdy sor sol jerge jobada kórsetilgendeı, aınalasyna aǵashtar egý úshin, topyraǵyn aýystyrý qajet. Qarjynyń kóp bóligi soǵan ketpekshi. Nege eskertkishti Qaraǵandyǵa, Jasybaıǵa ótip bara jatqandardyń da (jazda myńdaǵan demalýshylar keledi) kórýi úshin Baıannyń kire beris jaǵynda ornalastyrmasqa? Sonda topyraq aýystyrý qajeti de bolmaýshy edi.
Ekinshiden, Baıanaýyldaǵy 40 jyl turǵan, turǵyndarǵa astanadaǵy báıterekteı bolyp ketken, 2 ret kúrdeli jóndeýden ótken (sońǵysyna kóp bolǵan joq) stellany basqaǵa aýystyrmaqshy. Baqandaı jarty mıllıardqa jýyq teńgege?!
Osy ýaqytta Baıanaýyldyń ózi áli kanalızaııa, ony tazartý júıesinsiz otyr. Úlken aýyldyń nájis sýlary kól jaqqa aǵary belgili . Sońyra laılanǵan kólderge kim barar? Baıannyń  sý júıesinsiz otyrǵan 9 aýyly bar. Olardyń árqaısysyna sony tartý úshin ortasha 200 mıllıon teńge ketedi eken. Birshama aýyldardyń arasynda 30 jylda bir ret te jol salynbaǵan. Aıta berse shyǵa beretini sózsiz!
Shekten shyǵyp jatqan ınflıaııany qaperge almaı (buǵan da bıliktiń kinási joq dep kim aıtady?), nátıjesinde  pandemııa kezinde odan ármen  tabystary azaıyp jatqan aýyl jurtyna emes, týrıstik tabys kózin buǵattaýy múmkin ekologııaǵa emes, mádenıetke bólipti  orasan zor qarjyny. Biraq osy salada da tıimdi paıdalanýǵa boladyǵoı, aqyry bólingen soń? Qaıda, qaıda? Biraq dál Baıanaýylda ólketaný mýzeıi nege joq? Sosyn bul aýdanda basqa da osy salaǵa qarjy bólinýi tıis obektiler jetkilikti bolar?
Sońǵy 2 abzata kórsetilgen obekterdiń az emes bóligin (aýdan turǵyndarymen kelise otyra), osy eki  batyrǵa arnalǵan eskertkishpen qatar salýǵa bolatyny kórinip tur.
Biraq Skakov bastaǵan ákimdik 1,5 mıllıard teńgeni tek eki batyrǵa bir eskertkish  jáne stellany aıyrbastaýǵa ǵana jumsaıyn dep otyr....
Qalaısha osylaı sheshilip otyr? Álde jartysyna jýyq demeýshilerdiń aqshalary (olar kóbine suraýsyz bolady), týra suraǵanda, «raspıldyń» kózi me?  Tenderden bolatyn jemqorlyqtardy da bizdiń óńirde eshkim alyp tastamaǵan shyǵar? Buny sizderden surap otyrmyn, Skakov myrza?
Sóz sońynda osy 1,5 mıllıard aqshanyń (bul bizdiń, salyq tóleýshilerdiń qarjylary. Jáne demeýshilerdiń de aqshasy, qazaqtyń baılyǵy, halyqtyń jumys kúshi arqyly quralatyny málim) qaıda ketip jatqanyn  tıynyna deıin halyq aldynda esep berýińizdi talap etemiz! Óńirdegi depýtattardyń da qalaı saılanatynyn bilemiz. Kóbine ákimdiktiń qalaýymen saılanady. Sondyqtan olardyń kelisýin halyqtyń kelisýi dep eseptemeımiz, Skakov myrza!
Jalpy, jer-jerdegi barlyq ákimder halyqtyń aqshasyn aldaǵy jyldyń bıýdjetine qoıardyń aldynda  barlyq respýblıkalyq, jergilikti   BAQtarǵa jazyp, halyqtyń tikeleı talqylaýynan táýelsiz  halyq ózi senetin/saılaıtyn ekspertterdiń saraptamasynan ótkizgennen keıin ǵana  qoıylý ınstıtýty qalyptasýy kerek. Sonda jemqorlyqtyń kúrt azaıýy da sózsiz.

Rýza BEISENBAITEGI,

Qoǵam belsendisi

"Adyrna" ulttyq portaly 

 

Pikirler