قاسىم-جومارت توقاەۆ Leaders Talk باعدارلاماسىنا بەرگەن سۇقباتىندا قازاقستان مەن قىتاي اراسىنداعى قاتىناستار ماسەلەسىنە توقتالدى، دەپ حابارلايدى «ادىرنا» ءتىلشىسى.
«قىتاي ءبىزدىڭ سىرتقى ساياساتىمىزدا اسا ماڭىزدى ءرول اتقارادى. 2019 جىلى قىركۇيەك ايىندا مەن قىتايعا مەملەكەتتىك ساپارمەن باردىم. ءبىز قحر توراعاسى سي تسزينپينمەن ناتيجەلى كەلىسسوز جۇرگىزدىك. حالىقتارىمىزدىڭ ىنتىماقتاستىعىن نىعايتۋ ءۇشىن ەكى جاققا دا ءتيىمدى ساياسات جۇرگىزۋ جونىندە ۋاعدالاستىق. دەمەك، ءبىز ەكى ەل اراسىنداعى ستراتەگيالىق سەرىكتەستىكتى، ماڭگى دوستىقتى نىعايتا ءتۇسۋىمىز كەرەك. بۇل قازاق حالقىنىڭ مۇددەسىنە، ناقتىراق ايتقاندا، ۇزاقمەرزىمدى مۇددەسىنە تولىق ساي كەلەدى. مەن وسىنداي ساياساتتى بەرىك ۇستانۋعا نيەتتىمىن. جاقىن كورشىمىز – قىتايمەن اراداعى ستراتەگيالىق سەرىكتەستىكتىڭ ماڭىزدى ەكەنى ءسوزسىز»،—دەدى پرەزيدەنت.
مەملەكەت باسشىسى اڭگىمەلسۋ بارىسىندا ەكىجاقتى ەكونوميكالىق قاتىناستاردى دامىتۋ كەرەكتىگىن اتاپ ءوتتى.
«ەكونوميكالىق ىنتىماقتاستىق سالاسىندا كەرەمەت ناتيجەلەرگە قول جەتكىزدىك. بىراق ءبىز العا قاراي جىلجۋىمىز كەرەك. سوندىقتان مەن قىتاي وركەنيەتىنىڭ بەسىگى سانالاتىن سيان قالاسىنا جاسايتىن الداعى ساپارىمنان ءۇمىتىم مول. بىزگە جاڭا كەلىسىمدەر، جاڭا مامىلەلەر قاجەت. سەبەبى ءبىز ءبىر ورىندا قالىپ، ناتيجە كۇتىپ وتىرماۋىمىز كەرەك. وسىناۋ كۇردەلى الەمدە ەكونوميكالىق بايلانىستارىمىزدى نىعايتۋعا كۇش سالۋعا ءتيىسپىز. مەن ەكى ەل جاستارىنىڭ ىنتىماقتاستىعى مەن دوستىق قارىم-قاتىناسىن دامىتۋعا نيەتتىمىن. جاس بۋىن ءبىرىن-ءبىرى جاقسى ءبىلۋى قاجەت»،—دەدى ول.
