سىرتقى ىستەر ءمينيسترى ايبەك سماديار قىتايمەن ءوزارا ۆيزاسىز رەجيم تۋرالى كەلىسىم تۋرالى اقپاراتپەن ءبولىستى، دەپ جازادى "ادىرنا".
ونىڭ ايتۋىنشا، بۇل شەشىمنىڭ بىرقاتار پايدالى تۇستارى بار. ماسەلەن، ەكى ەل اراسىنداعى قارىم-قاتىناستاردىڭ دامۋىنا، ازاماتتار اراسىنداعى بايلانىستارعا، ساۋدا ساتتىقتى كەڭەيتۋگە ايتارلىقتاي قولداۋ بولماق دەيدى ول.
سونداي-اق، ول كەلىسىم ورناسا قىتاي ازاماتتارى ەلىمىزگە قاپتاپ كىرەدى دەگەن پىكىر شىندىققا جاناسپايتىنىن مالىمدەدى. سەبەبى بىلتىر شىلدە ايىنان باستاپ قازاقستان يران، ءۇندىستان جانە قىتايدىڭ ازاماتتارىنا ەلىمىزگە 14 كۇنگە دەيىن ۆيزاسىز كىرۋگە رۇقسات بەرگەن.
"ەلىمىز بەن قىتاي اراسىنداعى ۆيزاسىز رەجيم، ەڭ الدىمەن، قازاقستان ازاماتتارىنىڭ كورشى مەملەكەتكە بارۋىنا بارىنشا قولايلى جاعداي تۋدىرادى. ەگەر بۇرىن تەك قىتاي ازاماتتارى بىزگە ۆيزاسىز 14 كۇنگە كىرە الاتىن بولسا، بۇل كەلىسىمنەن كەيىن ولار دا، ءبىز دە ءبىر بىرىمىزگە 30 كۇنگە دەيىن ۆيزاسىز بارا الاتىن بولامىز" دەپ جازدى ول.
ونىمەن قوسا، مينيستر ەل اراسىندا ۆيزاسىز قازاقستانعا كەلگەن قىتاي ازاماتتارى ەلىمىزدە قالىپ قويادى، جۇمىس ورىندارىمىزدى تارتىپ الادى دەگەن پىكىرلەردىڭ شىندىققا جاناسپايتىنىن ايتتى. ويتكەنى ۆيزاسىز رەجيم تەك تۋريستىك جانە ىسكەرلىك ساپارلارعا ارنالادى جانە جۇمىس ىستەۋگە رۇقسات بەرمەيدى.
"بۇرىن قىتايعا بارۋ ءۇشىن ۆيزانى اشۋ، كونسۋلدىق الىمدى تولەۋ، ۇزاق كەزەكتە تۇرۋ (كەيدە 2-3 ايعا دەيىن), ۆيزا راسىمدەيتىن ارنايى كومپانيالاردىڭ قىزمەتىنە قوماقتى اقشا تولەۋ كەرەك ەدى. ال ۆيزاسىز رەجيم ەنگىزىلگەننەن كەيىن بۇل شارالاردىڭ ەشبىرى قاجەت بولمايدى. ۆيزاسىز رەجيم قاي ەلدە بولسىن شەتەلدەن كەلەتىن تۋريستەردىڭ سانىن ارتتىرۋعا باعىتتالعان. بۇل ەكونوميكاعا وڭ اسەر ەتەدى، ويتكەنى ەلگە كەلگەن تۋريست مىندەتتى تۇردە قوناق ۇيدە تۇرادى، كافە مەن مەيرامحانالاردا تاماقتانادى، كولىك قولدانادى، جالپى ايتقاندا ەلدە ءبىراز اقشا جۇمسايدى. ال قىتايلىق تۋريستەر الەمدە قالتالى تۋريستەر سانىنا جاتادى" دەپ قوستى ول.
"ادىرنا" ۇلتتىق پورتالى
