Syrtqy ister mınıstri Aıbek Smadııar Qytaımen ózara vızasyz rejım týraly kelisim týraly aqparatpen bólisti, dep jazady "Adyrna".
Onyń aıtýynsha, bul sheshimniń birqatar paıdaly tustary bar. Máselen, eki el arasyndaǵy qarym-qatynastardyń damýyna, azamattar arasyndaǵy baılanystarǵa, saýda sattyqty keńeıtýge aıtarlyqtaı qoldaý bolmaq deıdi ol.
Sondaı-aq, ol kelisim ornasa Qytaı azamattary elimizge qaptap kiredi degen pikir shyndyqqa janaspaıtynyn málimdedi. Sebebi byltyr shilde aıynan bastap Qazaqstan Iran, Úndistan jáne Qytaıdyń azamattaryna elimizge 14 kúnge deıin vızasyz kirýge ruqsat bergen.
"Elimiz ben Qytaı arasyndaǵy vızasyz rejım, eń aldymen, Qazaqstan azamattarynyń kórshi memleketke barýyna barynsha qolaıly jaǵdaı týdyrady. Eger buryn tek Qytaı azamattary bizge vızasyz 14 kúnge kire alatyn bolsa, bul kelisimnen keıin olar da, biz de bir birimizge 30 kúnge deıin vızasyz bara alatyn bolamyz" dep jazdy ol.
Onymen qosa, mınıstr el arasynda vızasyz Qazaqstanǵa kelgen Qytaı azamattary elimizde qalyp qoıady, jumys oryndarymyzdy tartyp alady degen pikirlerdiń shyndyqqa janaspaıtynyn aıtty. Óıtkeni vızasyz rejım tek týrıstik jáne iskerlik saparlarǵa arnalady jáne jumys isteýge ruqsat bermeıdi.
"Buryn Qytaıǵa barý úshin vızany ashý, konsýldyq alymdy tóleý, uzaq kezekte turý (keıde 2-3 aıǵa deıin), vıza rásimdeıtin arnaıy kompanııalardyń qyzmetine qomaqty aqsha tóleý kerek edi. Al vızasyz rejım engizilgennen keıin bul sharalardyń eshbiri qajet bolmaıdy. Vızasyz rejım qaı elde bolsyn shetelden keletin týrısterdiń sanyn arttyrýǵa baǵyttalǵan. Bul ekonomıkaǵa oń áser etedi, óıtkeni elge kelgen týrıst mindetti túrde qonaq úıde turady, kafe men meıramhanalarda tamaqtanady, kólik qoldanady, jalpy aıtqanda elde biraz aqsha jumsaıdy. Al qytaılyq týrıster álemde qaltaly týrıster sanyna jatady" dep qosty ol.
"Adyrna" ulttyq portaly
