جامبىل وبلىسىندا مەركى، شۋ، تالاس اۋداندارىندا اۋدانارالىق كوپبەيىندى ورتالىق اۋرۋحانالار اشىلادى. قاجەتتى ماماندارمەن جانە ءتيىستى ينفراقۇرىلىممەن قامتىلاتىن مەديتسينالىق نىساندار ارقىلى شۇعىل جانە ورتا تەحنولوگيالىق مەديتسينالىق كومەك الۋ قاشىقتىقتارى ايتارلىقتاي قىسقاراتىن بولادى.
بۇل تۋرالى جامبىل وبلىسىنىڭ اكىمى نۇرجان نۇرجىگىتوۆتىڭ توراعالىعىمەن وتكەن كەڭەستە ايتىلدى. باسقوسۋدا دەنساۋلىق ساقتاۋ سالاسىندا اتقارىلىپ جاتقان جۇمىستار سارالاندى.
وبلىستىق دەنساۋلىق ساقتاۋ باسقارماسىنىڭ باسشىسى جانار وسپانوۆانىڭ ايتۋىنشا، قازىرگى تاڭدا وڭىردە 389 دەنساۋلىق ساقتاۋ نىسانى قىزمەت كورسەتۋدە.
- 2022 جىلى 8,6 ميلليارد تەڭگەگە 26 دەنساۋلىق ساقتاۋ نىسانىنىڭ قۇرىلىسى جۇرگىزىلىپ، ونىڭ 20 پايدالانۋعا بەرىلدى. سونىمەن قاتار، 474,7 ميلليون تەڭگەگە 8 نىسانعا كۇردەلى جوندەۋ جۇمىستارى جۇرگىزىلدى.
ال اعىمداعى جىلى وبلىستا سالانىڭ ينفراقۇرىلىمىن جاقسارۋ ماقساتىندا 2,8 ميلليارد تەڭگەگە 19 جوبا باستالىپ، ونىڭ 17-ءسى تاپسىرىلادى دەپ كۇتىلۋدە.
وسى جىلدىڭ ءىى-توقسانىندا قۇنى 14,1 ميلليارد تەڭگەنى قۇرايتىن 200 توسەكتىك وبلىستىق ونكولوگيالىق ديسپانسەردى پايدالانۋعا بەرۋ كوزدەلگەن. سونداي-اق، وتكەن جىلدان وتپەلى 5 نىسان جوبالارى بيىل اياقتالادى،-دەدى جانار وسپانوۆا.
«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 2023-2024 جىلدار ارالىعىندا وبلىستا 5,2 ملرد. تەڭگەگە 30 نىساننىڭ قۇرىلىسىن جۇرگىزۋ جوسپارلانعان.
سونىمەن قاتار، جوبا شەڭبەرىندە 3 اۋداندا اۋدانارالىق كوپبەيىندى ورتالىق اۋرۋحانالار قۇرۋ بويىنشا قايتا جاڭعىرتۋ جۇمىستارى كوزدەلۋدە.
جوبا بارلىق اۋىلداردى ءتيىستى مەديتسينالىق ينفراقۇرىلىممەن قامتاماسىز ەتۋگە جانە حالىقتى ساپالى قىزمەتپەن قامتۋعا مۇمكىندىك بەرەدى.
ناتيجەسىندە، شۇعىل جانە ورتا تەحنولوگيالىق مەديتسينالىق كومەك الۋ قاشىقتىعى 500-دەن 200 شاقىرىمعا دەيىن قىسقارادى. دەنساۋلىق ساقتاۋ ۇيىمدارىنىڭ توزۋ دەڭگەيى 36,7 پايىزعا دەيىن تومەندەيدى دەپ جوسپارلانۋدا.
جيىندا سالاداعى كادر تاپشىلىعىن شەشۋ ماقساتىندا وبلىستىڭ گرانتىمەن جالپى مەديتسينا ماماندىعى بويىنشا 42 بىلىمگەر ءبىلىم الىپ جاتقاندىعى ايتىلدى.
سوڭعى 3 جىلدا جەرگىلىكتى بيۋدجەت ەسەبىنەن 9,1 ملرد. تەڭگەگە مەديتسينالىق قۇرال-جابدىقتار جانە مەديتسينالىق ماقساتتاعى بۇيىمدار الىندى. وعان قوسىمشا، قارجى ليزينگى شارتتارىمەن وبلىستىق جەدەل جاردەم ستانساسى 12 دانا سانيتاريالىق اۆتوكولىكپەن تولىقتى. ناتيجەسىندە، وسى جىلدىڭ 3 ايىندا مەديتسينالىق قۇرال-جابدىقتارمەن قامتاماسىز ەتۋ وبلىس بويىنشا 90,8 پايىزدى قۇراپ، 3,8 پايىزعا ءوستى.
بۇدان بولەك باسقوسۋدا بىرىڭعاي الەۋمەتتىك-مەديتسينالىق ساقتاندىرۋ بويىنشا اتقارىلىپ جاتقان جۇمىستاردىڭ ەسەبى تىڭدالدى.
وبلىس اكىمى وسى تۇرعىدا حالىق اراسىندا ءتۇسىندىرۋ شارالارىن كۇشەيتۋ جانە بۇل باعىتتاعى اۋىل اكىمدىكتەرىنىڭ جۇمىسىنىڭ ماڭىزدىلىعىن اتاپ ءوتتى. ساقتاندىرىلعانداردىڭ سانىن ەسەلەي وتىرىپ، مەديتسينالىق قىزمەتتىڭ ساپاسىن دا ارتتىرۋ كەرەكتىگىنە باسىمدىق بەردى.
ايماق باسشىسى دەنساۋلىق ساقتاۋ سالاسىنداعى كادر تاپشىلىعىن جويۋ، مامانداردى وقىتۋ، بارلىق ەلدى مەكەندەردى العاشقى مەديتسينالىق كومەك كورسەتەتىن نىساندارمەن قامتۋ، قىزمەت ساپاسىن ارتتىرۋ سەكىلدى ماسەلەلەر بويىنشا جاۋاپتىلارعا ناقتى مىندەتتەر جۇكتەدى.
"ادىرنا" ۇلتتىق پورتالى
