قازاقستانداعى سابيلەر ۇيىندە قازىر 707 ءبۇلدىرشىن تۇرىپ جاتىر، ال بالالار ۇيىندە 4916 تاربيەلەنۋشى بار. ءماجىلىس دەپۋتاتى قاراقات ابدەن بالالار ءۇيى مەن سابيلەر ۇيىندەگى تاربيەلەنۋشىلەرگە بولىنەتىن قاراجاتتى جوبالاۋدىڭ بالاماسىن ۇسىنىپ، بالا اسىراپ العان وتباسىعا مەملەكەتتەن اي سايىن 1 ملن تەڭگە تولەۋ قاجەت ەكەندىگىن ايتتى، دەپ حابارلايدى "ادىرنا" ۇلتتىق پورتالى.
بالالار ۇيىندەگى بۇلدىرشىنگە اي سايىن بولىنەتىن قاراجاتتى بالا اسىراپ العىسى كەلەتىن وتباسىعا باعىتتاۋ كەرەك. بۇل ارقىلى بالالاردى وتباسىعا بەرۋدىڭ فورماسىن دامىتۋعا بولادى. بۇل تۋرالى ءماجىلىس دەپۋتاتى قاراقات ابدەن پرەمەر-ءمينيستردىڭ ورىنباسارى التاي كولگىنوۆكە جولداعان دەپۋتاتتىق ساۋالىندا مالىمدەدى.
ەلىمىز بويىنشا قازىر سابيلەر ۇيىندە 707 ءبۇلدىرشىن تۇرىپ جاتىر، ال بالالار ۇيىندە 4916 تاربيەلەنۋشى بار.
"بۇرىنعى كەزدەرمەن سالىستىرعاندا، بۇل ءبىرشاما جاقسى كورسەتكىش. ەندى وسى ءۇردىستى باسەڭدەتپەي بالالاردى وتباسىلارعا ورنالاستىرۋدىڭ جولدارىن دامىتۋ كەرەك. قازىر جەتىم، اتا-انا قامقورلىعىنسىز قالعان بالالاردى وتباسىعا بەرۋدىڭ بىرنەشە فورماسى بار: بالا اسىراپ الۋ; قامقورشىلىق; پاتروناتتىق تاربيە; پاتروناتتىق جانۇيا. ونىڭ قاتارىندا كاسىبي نەمەسە فوستەرلىك وتباسىلاردى قۇرۋ باستاماسى دا بار. بۇل جوبا دا ەلىمىزدەگى بالالار ءۇيىنىڭ سانىن ازايتۋعا باعىتتالعانى بەلگىلى. وسى ورايدا پيلوتتىق فورماتتا ىسكە قوسىلعان بۇل جوبانىڭ قازىرگى جاعدايى قانداي؟ ارنايى دايىندىقتان وتكەن فوستەرلىك وتباسىلاردىڭ سانى ارتتى ما؟ ەلىمىزدەگى جەتىم بالالاردى ورنالاستىرۋعا شامامەن 500 فوستەرلىك وتباسى قاجەت دەپ كورسەتىلگەن", – دەدى دەپۋتات.
دەپۋتات، سونىمەن قاتار، بالالار ءۇيى جەتىمدەردى الەۋمەتتەندىرۋ بويىنشا ءتيىمدى جۇمىس جاساي الماي وتىرعانىن ايتتى. وسى رەتتە ءوز ۇسىنىسىن ءبىلدىردى.
"كوپ جاعدايدا بالالار ءۇيىنىڭ جەتەكشىلەرى اسىراپ العىسى كەلەتىندەرگە نەمەسە پاتروناتتىق وتباسىلارعا ولاردى بەرۋگە نيەت بىلدىرمەيدى. باس پروكۋراتۋرا مەن بالا اسىراپ الۋ جونىندەگى اگەنتتىك تاراپىنان جۇرگىزىلگەن تەكسەرىستىڭ ناتيجەسىندە ءتىپتى بالا اسىراپ الۋعا قارسى جاساندى كەدەرگىلەردى ويلاپ تاپقان جەتەكشىلەر دە انىقتالدى. ويتكەنى ءار بالاعا مەملەكەتتەن كولەمدى اقشا بولىنەدى. مىسالى، بالالار ۇيىندەگى ءبىر ءبۇلدىرشىن ءۇشىن مەملەكەتتەن ايىنا 1 ميللليونعا جۋىق قاراجات بەرىلەدى. وسى قاراجاتتى بالا اسىراپ العىسى كەلەتىن وتباسىلاردى قولداۋعا باعىتتاساق، بالا ءۇشىن بۇل الدەقايدا پايدالى بولارى انىق", – دەدى قاراقات ابدەن.
"ادىرنا" ۇلتتىق پورتالى
