Qazaqstandaǵy sábıler úıinde qazir 707 búldirshin turyp jatyr, al balalar úıinde 4916 tárbıelenýshi bar. Májilis depýtaty Qaraqat Ábden balalar úıi men sábıler úıindegi tárbıelenýshilerge bólinetin qarajatty jobalaýdyń balamasyn usynyp, bala asyrap alǵan otbasyǵa memleketten aı saıyn 1 mln teńge tóleý qajet ekendigin aıtty, dep habarlaıdy "Adyrna" ulttyq portaly.
Balalar úıindegi búldirshinge aı saıyn bólinetin qarajatty bala asyrap alǵysy keletin otbasyǵa baǵyttaý kerek. Bul arqyly balalardy otbasyǵa berýdiń formasyn damytýǵa bolady. Bul týraly májilis depýtaty Qaraqat Abden premer-mınıstrdiń orynbasary Altaı Kólginovke joldaǵan depýtattyq saýalynda málimdedi.
Elimiz boıynsha qazir sábıler úıinde 707 búldirshin turyp jatyr, al balalar úıinde 4916 tárbıelenýshi bar.
"Burynǵy kezdermen salystyrǵanda, bul birshama jaqsy kórsetkish. Endi osy úrdisti báseńdetpeı balalardy otbasylarǵa ornalastyrýdyń joldaryn damytý kerek. Qazir jetim, ata-ana qamqorlyǵynsyz qalǵan balalardy otbasyǵa berýdiń birneshe formasy bar: bala asyrap alý; qamqorshylyq; patronattyq tárbıe; patronattyq januıa. Onyń qatarynda kásibı nemese fosterlik otbasylardy qurý bastamasy da bar. Bul joba da elimizdegi balalar úıiniń sanyn azaıtýǵa baǵyttalǵany belgili. Osy oraıda pılottyq formatta iske qosylǵan bul jobanyń qazirgi jaǵdaıy qandaı? Arnaıy daıyndyqtan ótken fosterlik otbasylardyń sany artty ma? Elimizdegi jetim balalardy ornalastyrýǵa shamamen 500 fosterlik otbasy qajet dep kórsetilgen", – dedi depýtat.
Depýtat, sonymen qatar, balalar úıi jetimderdi áleýmettendirý boıynsha tıimdi jumys jasaı almaı otyrǵanyn aıtty. Osy rette óz usynysyn bildirdi.
"Kóp jaǵdaıda balalar úıiniń jetekshileri asyrap alǵysy keletinderge nemese patronattyq otbasylarǵa olardy berýge nıet bildirmeıdi. Bas prokýratýra men bala asyrap alý jónindegi agenttik tarapynan júrgizilgen tekseristiń nátıjesinde tipti bala asyrap alýǵa qarsy jasandy kedergilerdi oılap tapqan jetekshiler de anyqtaldy. Óıtkeni ár balaǵa memleketten kólemdi aqsha bólinedi. Mysaly, balalar úıindegi bir búldirshin úshin memleketten aıyna 1 mılllıonǵa jýyq qarajat beriledi. Osy qarajatty bala asyrap alǵysy keletin otbasylardy qoldaýǵa baǵyttasaq, bala úshin bul áldeqaıda paıdaly bolary anyq", – dedi Qaraqat Ábden.
"Adyrna" ulttyq portaly
