«2023 جىلى 47 (2022 جىلى 26) قۇرىلىس وبەكتىلەرىنە جوسپاردان تىس تەكسەرۋ جۇمىستارى جۇرگىزىلىپ، 79 (2022 جىلى 36) اكىمشىلىك ءىس قوزعالىپ، 22 770 030 تەڭگەگە (2022 جىلى 8 879 664 تەڭگەگە) اكىمشىلىك ايىپپۇل سالىندى.» وسىلاي دەپ، جامبىل وبلىسى اكىمدىگىنىڭ مەملەكەتتىك ساۋلەت- قۇرىلىس باقىلاۋ باسقارماسىنىڭ باسشىسى بيسەمباەۆ قايرات اشيرالىۇلى وڭىرلىك كوممۋنيكاتسيالار قىزمەتىندە باق وكىلدەرىمەن وتكەن بريفينگتە ايتتى.
«باسقارمامەن جۋالى اۋدانى قايرات اۋىلىنداعى 149 ورىندىق مادەنيەت ءۇيىنىڭ قۇرىلىسىنا تەكسەرۋ جۇرگىزىلىپ، نىسانىنىڭ باس مەردىگەرى «ەرك استانا» جشس-نە اكىمشىلىك ءىس قوزعالىپ، سوت شەشىمىمەن (1 380 000 تەڭگە اكىمشىلىك ايىپپۇل سالىنىپ), ليتسەنزياسىنان ايىردى (سوت شەشىمى زاڭدى كۇشىنە ەندى). سونىمەن قاتار، 4 تەحنيكالىق قاداعالاۋشىنىڭ (ا.بوزجيگيتوۆ («DACO ينجينيرينگ» جشس), ن.كانسەيتوۆتىڭ («نەوگەوسترويپروەكت» جشس), ب.يساباەۆ («زكا پروەكت» جشس) جانە ءۇ.جاقسىباي («زكا پروەكت» جشس)) اتتەستاتتارى 6 اي مەرزىمگە توقتاتىلدى.
جالپى تەكسەرۋدىڭ 4 ءتۇرى بار:
تەكسەرۋدىڭ ءبىرىنشى ءتۇرى جوسپارلى تەكسەرۋ. ول 2015 جىلدان باستاپ توقتاعان. ەكىنشى ءتۇرى جوسپاردان تىس تەكسەرۋ. بۇل كەلىپ تۇسكەن ارىز-شاعىمدار، مەملەكەتتىك ورگانداردىڭ حاتتارى مەن پروكۋراتۋرا ورگاندارىنىڭ ۇسىنىستارى نەگىزىندە جۇرگىزىلەتىن تەكسەرۋ. تۇسكەن ماتەرالداردا ادامنىڭ ومىرىنە، قورشاعان ورتاعا زيان كەلتىرۋدىڭ ناقتى فاكتىلەرى بولۋى قاجەت. تەكسەرۋدىڭ ءۇشىنشى ءتۇرى باقىلاۋدىڭ وزگە دە نىسانى. ول 2018 جىلدىڭ 24 مامىرىنان توقتاتىلعان. تەكسەرۋدىڭ ءتورتىنشى ءتۇرى «رۇقساتتار جانە حابارلامالار تۋرالى» قازاقستان رەسپۋبليكاسىنىڭ زاڭىنا سايكەس، بەرىلگەن رۇقساتتار بويىنشا بىلىكتىلىك نەمەسە رۇقسات بەرۋ تالاپتارىنا، جىبەرىلگەن حابارلامالار بويىنشا تالاپتارعا سايكەستىگىنە جۇرگىزىلەتىن تەكسەرۋ. تەكسەرۋدىڭ بۇل ءتۇرى كاسىپكەرلىك كودەكسىندە 2023 جىلدىڭ 1 قاڭتارىندا بولعان وزگەرىستەرگە سايكەس ەنگىزىلگەن تەكسەرۋدىڭ جاڭا ءتۇرى. تەكسەرۋ تاۋەكەلدەردى باعالاۋ ولشەمشارتتارى نەگىزىندە قالىپتاستىرىلاتىن گرافيككە سايكەس جۇرگىزىلەدى.باسقارما ءوز قۇزىرەتى شەگىندە تەك باقىلاۋ جۇرگىزىپ قانا قويماي، قۇرىلىس جۇمىستارىنداعى كەمشىلىكتەردىڭ الدىن الۋ ماقساتىندا پروفيلاكتيكالىق جۇمىستاردى دا قارقىندى ىسكە اسىرۋدا،- دەيدى باسقارما باسشىسى.
سونداي-اق قايرات بيسەمباەۆ بۇگىنگى كۇندە وبلىستا قۇرىلىس جۇمىستارىنىڭ قارقىنى وسكەنىن دە اتاپ ءوتتى. وبلىس اۋماعىندا قۇرىلىسى جۇرگىزىلىپ جاتقان 370 نىساننىڭ (2022 ج. — 603, و.ءى. 291 مەملەكەتتىك بيۋدجەت ەسەبىنەن، 312 جەكە قاراجات ەسەبىنەن), 259-ى مەملەكەتتىك بيۋدجەت ەسەبىنەن (224 – وتپەلى; 35 – جاڭا), ال قالعان 111-ءى جەكە قاراجات ەسەبىنەن ەكەن.
"ادىرنا" ۇلتتىق پورتالى
