بۇگىنگى تاڭدا وڭىرىمىزدە مەملەكەت باسشىسىنىڭ تاپسىرمالارىن ورىنداۋ ماقساتىندا اتالعان جانە باسقا دا جارقىن جوبالار شەڭبەرىندە ءتيىستى جۇمىستار اتقارىلۋدا.
وبلىس اكىمدىگى دەنساۋلىق ساقتاۋ باسقارماسىنىڭ باسشىسى جانار وسپانوۆانىڭ ايتۋىنشا، ستاتيستيكا دەپارتامەنتىنىڭ سوڭعى دەرەكتەرىنە سايكەس وبلىس بويىنشا 1 219 437 تۇرعىنعا 389 دەنساۋلىق ساقتاۋ نىسانى قىزمەت كورسەتەدى. سونداي-اق، وبلىستا 369 ەلدى مەكەن بولسا، 284-ءى جەدەل جاردەممەن قامتىلعان. ال 88-ءى جەدەل مەديتسينالىق كومەكپەن قامتىلماعان.
– وبلىس بويىنشا بارلىعى 11 جىلجىمالى مەديتسينالىق كەشەن بار. بيىل بارلىعى 265 ەلدى مەكەندى قامتۋ جوسپارلانسا، جىل باسىنان بەرگى 3 ايدا 72-ءسى قامتىلدى. سونداي-اق، 2023 جىلى 96 239 تۇرعىندى مەديتسينالىق تەكسەرۋمەن قامتۋ جوسپارلانىپ، 3 ايدا 29 309 تۇرعىن قامتىلدى. 7 273 دياگنوستيكالىق زەرتتەۋ، 1 434 زەرتحانالىق تەكسەرۋ، 40 540 بەيىندى مامانداردىڭ كونسۋلتاتسياسى كورسەتىلدى. تۇرعىنداردى قاراۋ بارىسىندا 1 697 ناۋقاس انىقتالدى، – دەگەن جانار مىقتىبەكقىزى سالادا قۇرىلىس جۇمىستارى دا قارقىن العانىن ايتتى.
ماسەلەن، وتكەن جىلى 8,6 ميلليارد تەڭگەگە 26 دەنساۋلىق ساقتاۋ نىسانىنىڭ قۇرىلىسى جۇرگىزىلىپ، 20-سى پايدالانۋعا بەرىلگەن. سونىمەن قاتار، 474,7 ميلليون تەڭگەگە 8 نىسان كۇردەلى جوندەۋدەن وتكەن. ال بيىل وڭىردە سالانىڭ ينفراقۇرىلىمىن جاقسارتۋ ماقساتىندا 2,8 ميلليارد تەڭگەگە 19 جوبا باستالعان. جىل سوڭىنا دەيىن 17-ءسى پايدالانۋعا بەرىلەدى.
– قوسىمشا «اۋىل – ەل بەسىگى» جوباسى شەڭبەرىندە قورداي اۋدانىندا ماسانشى اۋىلدىق اۋرۋحاناسىنىڭ ەمحاناسىنا قوسىمشا قۇرىلىس سالۋعا جانە سورتوبە اۋىلىنداعى اۋىلدىق اۋرۋحانا اۋماعىندا ءبىر اۋىسىمدا 200 ادام قابىلدايتىن ەمحانا سالۋ جوباسىنا قاراجات قارالدى.
«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 2023-2024 جىلدار ارالىعىندا وڭىردە 5,2 ميلليارد تەڭگەگە 30 نىساننىڭ قۇرىلىسىن جۇرگىزۋ جوسپارلانعان. سونىمەن قاتار جوبا شەڭبەرىندە 3 اۋداندا (مەركى، شۋ، تالاس اۋداندارىندا) اۋدانارالىق كوپبەيىندى ورتالىق اۋرۋحانالار قۇرۋ ءۇشىن قايتا جاڭعىرتۋ جۇمىستارىن جۇرگىزۋ كوزدەلۋدە. جالپى جوبا بارلىق اۋىلداردى ءتيىستى مەديتسينالىق ينفراقۇرىلىممەن جانە حالىقتى ساپالى قىزمەتپەن قامتۋعا مۇمكىندىك بەرەدى. شۇعىل جانە ورتا تەحنولوگيالىق مەديتسينالىق كومەك الۋ قاشىقتىعى 500-دەن 200 شاقىرىمعا دەيىن قىسقارادى. ناتيجەسىندە دەنساۋلىق ساقتاۋ ۇيىمدارىنىڭ توزۋ دەڭگەيى 38,8 پايىزدان 36,7 پايىزعا دەيىن تومەندەيدى.
بۇدان بولەك 1,4 ميلليارد تەڭگەگە 10 نىساننىڭ كۇردەلى جوندەۋ جۇمىستارى جۇزەگە اسىرىلدى. جالپى سيپاتتاعى ترانسفەرتتەرمەن 1486,7 ميلليون تەڭگە بەكىتىلىپ، وسى قارجى شەڭبەرىندە 9 نىساندى كۇردەلى جوندەۋدەن وتكىزۋ جوسپارلانۋدا. مۇنىڭ بارلىعى سالاداعى كورسەتكىشتەردىڭ وڭ ديناميكاسىن قالىپتاستىرۋعا سەپتىگىن تيگىزەدى، – دەيدى جانار وسپانوۆا. باسقارما باسشىسىنىڭ سوزىنە سۇيەنسەك، دەنساۋلىق ساقتاۋ نىساندارىنىڭ ماتەريالدىق-تەحنيكالىق بازاسىن جابدىقتاۋعا دا ايرىقشا نازار اۋدارىلعان. سوڭعى 3 جىلدا جەرگىلىكتى بيۋدجەت ەسەبىنەن 9,1 ميلليارد تەڭگەگە ماتەريالدىق-تەحنيكالىق بازانى نىعايتۋعا مەديتسينالىق قۇرال-جابدىقتار جانە مەديتسينالىق ماقساتتاعى بۇيىمدار الىنىپتى. رەسپۋبليكالىق بيۋدجەت قاراجاتى ەسەبىنەن 1 سىزىقتىق ۇدەتكىش ساتىپ الىنعان. وعان قوسىمشا قارجى ليزينگى شارتتارىمەن 12 دانا سانيتاريالىق اۆتوكولىك وبلىستىق جەدەل جاردەم ستانساسىنا تابىستالعان. ناتيجەسىندە 2023 جىلدىڭ 3 ايىندا مەديتسينالىق قۇرال-جابدىقتارمەن قامتاماسىز ەتۋ وبلىس بويىنشا 90,8 پايىزدى قۇراپ، 3,8 پايىزعا وسكەن.
ال 2023 جىلدىڭ ءبىرىنشى توقسانىنىڭ قورىتىندىسىمەن «دەنى ساۋ ۇلت» ءاربىر ازامات ءۇشىن ساپالى جانە قولجەتىمدى دەنساۋلىق ساقتاۋ» ۇلتتىق جوباسى كورسەتكىشتەرىنىڭ 3 ماقساتتى ينديكاتورى مەن 10 نىسانالى كورسەتكىشىنىڭ بىرەۋىنە قول جەتكىزىلمەگەن.
2023 جىلدىڭ ءتورت ايىنىڭ قورىتىندىسىمەن 3 انا ءولىمى تىركەلىپ، وبلىستىق كورسەتكىش 36,8-ءدى قۇراپ وتىر ەكەن. سونداي-اق، وبلىستىڭ 2022- 2024 جىلدارعا ارنالعان حالىقتىڭ دەنساۋلىق جاعدايىن جاقسارتۋ بويىنشا قازاقستان رەسپۋبليكاسىنىڭ دەنساۋلىق ساقتاۋ ءمينيسترى مەن وبلىس اكىمى اراسىندا جاسالعان مەموراندۋم كورسەتكىشتەرىنىڭ بىرەۋىنە قول جەتكىزىلمەگەن. الداعى ۋاقىتتا ماقساتتى ينديكاتورلار مەن نىسانالى كورسەتكىشتەردى تولىق ورىنداۋ ءۇشىن كەشەندى جۇمىس اتقارىلماق. وسى ورايدا كادر ماسەلەسىنە توقتالماي كەتۋگە بولمايدى. مەديتسينا سالاسىنداعى قانى شىعىپ تۇرعان ءتۇيىندى ماسەلەنىڭ ءبىرى – مامان تاپشىلىعى. بۇگىندە سالا باسشىلىعى تۇيتكىلدى ماسەلەنىڭ ءتۇيىنىن تارقاتۋعا ۇمتىلىپ-اق جاتىر. وبلىسىمىزدا قازىرگى تاڭدا 341 باستاپقى مەديتسينالىق-سانيتاريالىق كومەك جانە 36 اۋرۋحانالىق نىساندا 15 783 مەديتسينالىق قىزمەتكەر قىزمەت اتقارۋدا. 2022 جىلدىڭ قورىتىندىسىمەن 120 مامان تاپشى بولسا، بۇگىندە وڭىردەگى دەنساۋلىق ساقتاۋ مەكەمەلەرىنە 80 دارىگەر جەتىسپەيدى.
– مامان تاپشىلىعىن شەشۋ ماقساتىندا وبلىستىڭ گرانتىمەن جالپى مەديتسينا ماماندىعى بويىنشا 42 ستۋدەنت وقيدى. بيىل جوعارى وقۋ ورنىن بىتىرگەن 16 دارىگەر جۇمىسقا كىرىستى. قوسىمشا 63 دارىگەر رەزيدەنتۋرادا وقيدى. رەسپۋبليكالىق بيۋدجەت ەسەبىنەن 46 رەزيدەنت، مەديتسينالىق ۇيىم ەسەبىنەن 5 مامان رەزيدەنتۋرادا وقىتىلۋدا.
سوڭعى 3 جىلدا 415 جاس مامان كەلدى. جاس مامانداردى تۇراقتاندىرۋ ماقساتىندا جەرگىلىكتى بيۋدجەت ەسەبىنەن 800 مىڭ تەڭگە كوتەرمەاقى ءبولۋ، رەسپۋبليكالىق بيۋدجەت ەسەبىنەن 1 500 اەك كولەمىندە بيۋدجەتتىك كرەديت ءبولۋ، 100 اەك كولەمىندە كوتەرمە جاردەماقى بەرۋ جانە كوممۋنالدىق قىزمەتتەرگە ارنالعان شىعىنداردى وتەۋ سەكىلدى الەۋمەتتىك قولداۋ شارالارى كورسەتىلۋدە، – دەيدى ج.وسپانوۆا.
