ايبەك ابزەلبەك. جول ماسەلەسىن ءبىر اۋىز سوزبەن شەشكەن وقۋشى قازىر قايدا ەكەن؟

34444
Adyrna.kz Telegram

الەۋمەتتىك جەلىدە مەكتەپكە بارىپ قايتۋ ءۇشىن كۇنىنە 9 شاقىرىم جاياۋ جۇرەتىن وقۋشىلاردىڭ جانايقايىن جەتكىزگەن ءجاسوسپىرىمنىڭ ۆيدەوسى قىزۋ تالقىلانىپ جاتىر، دەپ حابارلايدى «ادىرنا» ءتىلشىسى.

بەينەجازبا وسىدان 8 جىل بۇرىن جامبىل وبلىسى جۋالى اۋدانىندا تۇسىرىلگەن.

2014 جىلى كۇرەڭبەل اۋىلىنىڭ ورتا مەكتەبىندە وقيتىن وقۋشىلاردى تاسىمالدايتىن اۆتوبۋس اۋداندىق ءبىلىم ءبولىمىنىڭ شەشىمىمەن قاتىناس توقتاعان. سونىڭ سالدارىنان بالالار مەن ءۇستازداردىڭ مەكتەپكە بارۋى قيىنداعان. بۇل ماسەلەنى اۋىل حالقى بەي-جاي قالدىرماي، تاسىمالدى قايتا جانداندىرۋدى تالاپ ەتۋ ءۇشىن جۋرناليستەردى شاقىرىپ، سۇقبات بەرگەن.

پىكىر بىلدىرۋشىلەردىڭ ىشىندە 7-سىنىپ وقۋشىسى ايبەك ابزەلبەك تە بولعان.

«مەكتەپكە جاياۋ بارىپ، جاياۋ كەلەمىز. قوسىمشا ساباقتار دەيدى، باسقا نارسەلەرگە شاقىرتادى. بارماساڭ تاعى ۇرسادى. بارساڭ تاعى بالە، بارماساڭ تاعى بالە. بۇل ازىرگە ەشتەمە ەمەس، الايدا قىستا قيىن بولايىن دەپ تۇر. ويتكەنى اياق كيىم شاق كەلمەيدى. كەمىندە ءبىر بالاعا 2 اياق كيىمنەن كەرەك. بىزدىكى ەشتەمە ەمەس، ۇيدە 4 بالامىز. ال كەيبىرەۋىندە 7-8 بالا بار. سوندا ولاردىڭ جاعدايى نە بولماق؟»— دەدى ءجاسوسپىرىم.

جەلى پايدالانۋشىلارىن وقۋشى بالانىڭ سويلەۋ مانەرى ءتانتى ەتتى.

«قالاي ويىن جيناقى ايتىپ تۇر؟ ءبىز بولساق، ساسقالاقتاپ ەكى ءسوزدىڭ باسىن قوسا المايمىز»، «تاقىلداپ تۇر ەكەن»، «بولاشاق دەپۋتات قوي»، «ءدال وسى بالاداي ءبىزدىڭ ۇكىمەت جارىتىپ سويلەي المايدى»،—دەپ پىكىر ءبىلدىردى قولدانۋشىلار.

«ادىرنا» ءتىلشىسى ءبىر ءساتتى قازنەتتە جۇلدىز بولعان بالامەن تىلدەسىپ، بەينەجازبانىڭ قالاي تارالعانىن سۇرادى.

«ءوزىم شوك بولىپ ءجۇرمىن. شىنى كەرەك، بۇل ۆيدەو الەۋمەتتىك جەلىگە كەزدەيسوق سالىندى. ونى جۇكتەۋ مۇلدەم ويدا جوق بولاتىن. جاقىندا عانا تانىسقان دوس بالام ءوزىنىڭ TikTok پاراقشاسىنا سالىپ، ءبىراز قارالىم جيناپ ۇلگەرىپتى. قازىر جان-جاقتان حابارلاسىپ، باعدارلامالارعا شاقىرىپ جاتىر»،—دەدى ايبەك.

ايتۋىنشا، تۇرعىندار كوتەرگەن ماسەلە باق بەتىنە شىققاننان كەيىن بىردەن شەشىلگەن.

قازىر ايبەك ابزەلبەك 21 جاستا.

«ءال-فارابي اتىنداعى قازاق ۇلتتىق ۋنيۆەرسيتەتىندە ءبىلىم الامىن. تاريح فاكۋلتەتىنىڭ 4-ءشى كۋرس ستۋدەنتىمىن»،—دەدى ول.

 

<

پىكىرلەر