نازارباەۆتىڭ نەمەرە ءىنىسى قايرات ساتىبالدىنىڭ قازاقستاننان زاڭسىز شىعارىلعان اكتيۆى مەملەكەتكە قايتارىلدى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى مالىمدەدى، دەپ حابارلايدى “ادىرنا” ۇلتتىق پورتالى.
سىبايلاس جەمقورلىققا قارسى ءىس-قيمىل اگەنتتىگى قايرات ساتىبالدىۇلىنا جانە باسقا دا ادامدارعا قاتىستى جۇرگىزىلىپ جاتقان تەرگەپ-تەكسەرۋ اياسىندا قازاقستاننان زاڭسىز شىعارىلعان اكتيۆتەردى، ونىڭ ىشىندە قىلمىستىق جولمەن الىنعان قاراجاتتى جانە وزگە دە مۇلىكتى قايتارۋ جونىندە شارالار قابىلداپ جاتىر.
بيىل مامىردىڭ سوڭىندا اگەنتتىك شەت مەملەكەتتەردىڭ قۇقىق قورعاۋ ورگاندارى جانە باس پروكۋراتۋرامەن بىرلەسىپ، بىرىككەن اراب امىرلىكتەرىنەن جالپى سوماسى 14 ملن دوللاردى قايتاردى. قاراجات مەملەكەت كىرىسىنە اينالدىرىلىپ، الەۋمەتتىك ماقساتتا پايدالانىلادى.
قىلمىستىق قۋدالاۋ باستالعاننان بەرى مەملەكەتكە زاڭسىز ساتىپ الىنعان قايرات ساتىبالدىۇلى جانە ونىمەن بايلانىستى ادامداردىڭ 464 ملرد تەڭگەدەن اساتىن مۇلىكتىك اكتيۆتەرى مەن اقشاسى قايتارىلدى، دەلىنگەن حابارلامادا.
ولارعا اكىمشىلىك عيماراتتار، ەكسكليۋزيۆتى زەرگەرلىك بۇيىمدار، ءساندى كولىكتەر، قولما-قول اقشا، اكتسيالار مەن كومپانيالاردىڭ ۇلەستەرى، سونداي-اق تەمىرجول كىرەدى.
زاڭسىز شىعارىلعان اكتيۆتەردى قايتارۋ بويىنشا جۇمىس جالعاسىپ جاتىر.
