شقو اكىمى دانيال احمەتوۆ قىزمەتىنەن بوساتىلدى. بۇل تۋرالى اقوردا جازدى، دەپ حابارلايدى «ادىرنا» ءتىلشىسى.
«مەملەكەت باسشىسىنىڭ جارلىعىمەن دانيال كەنجەتايۇلى احمەتوۆ شىعىس قازاقستان وبلىسىنىڭ اكىمى لاۋازىمىنان بوساتىلدى»،—دەلىنگەن حابارلامادا.ايتا كەتەيىك، 15 ماۋسىمدا احمەتوۆ 69 جاسقا تولدى. ول وبلىستى 9 جىل بويى باسقارعان بولاتىن. 2017 جىلى اكىمنىڭ رەسمي تۇردە زەينەتكە كەتۋى مۇمكىن ەكەنى ايتىلدى. الايدا ونىڭ وكىلەتتىگى 2022 جىلعا دەيىن سوزىلعان ەدى. وتكەن جىلدىڭ 11 ماۋسىمىندا مەملەكەت باسشىسى احمەتوۆتىڭ وكىلەتتىگىن تاعى ءبىر جىلعا ۇزارتتى. شەشىم اكىمنىڭ «كوپ جىلدىق جۇمىس تاجىريبەسىمەن»تۇسىندىرىلدى. دانيال احمەتوۆ بۇعان دەيىن پاۆلودار وبلىسىنىڭ اكىمى، قر پرەمەر-ءمينيسترى، قر قورعانىس ءمينيسترى قىزمەتتەرىن اتقاردى. ەۋرازيالىق ەكونوميكالىق كوميسسيانىڭ ەنەرگەتيكا جانە ينفراقۇرىلىم جونىندەگى القا مۇشەسى بولدى.