ەرمەك كوشەرباەۆ شىعىس قازاقستان وبلىسىنىڭ اكىمى بولىپ تاعايىندالدى، دەپ حابارلايدى «ادىرنا» ءتىلشىسى.
«مەملەكەت باسشىسىنىڭ جارلىعىمەن ەرمەك بەدەلبايۇلى كوشەرباەۆ شىعىس قازاقستان وبلىسىنىڭ اكىمى بولىپ تاعايىندالدى. ول قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى لاۋازىمىنان بوساتىلدى»،—دەپ جازدى اقوردانىڭ ءباسپاسوز قىزمەتى.
بۇگىن شقو اۋماعىنداعى ءماسليحاتتار دەپۋتاتتارىنىڭ جينالىسىندا وبلىس اكىمى لاۋازىمىنا 2 كانديدات ۇسىنىلدى. ولار – قازاقستاننىڭ رەسەيدەگى توتەنشە جانە وكىلەتتى ەلشىسى ەرمەك كوشەرباەۆ جانە شىعىس قازاقستان وبلىسى اكىمىنىڭ ورىنباسارى دارحان ساپانوۆ. ۇمىتكەرلەردى ءماسليحاتتاردىڭ 153 دەپۋتاتىنا ۇكىمەت باسشىسى ءاليحان سمايىلوۆ تانىستىردى.
ەرمەك كوشەرباەۆقا 117, ال دارحان ساپانوۆقا 36 دەپۋتات داۋىس بەردى.
ايتا كەتەيىك، ەرمەك بەدەلبايۇلى 1965 جىلى الماتىدا تۋعان. س.م.كيروۆ اتىنداعى قازاق مەملەكەتتىك ۋنيۆەرسيتەتىن (قازىرگى ءال-فارابي اتىنداعى قازۇۋ - رەد.), كسرو سىرتقى ىستەر مينيسترلىگىنىڭ ديپلوماتيالىق اكادەمياسىن بىتىرگەن. ول «ەرەن ەڭبەگى ءۇشىن» مەدالىمەن، «قۇرمەت» وردەنىمەن ماراپاتتالعان. توتەنشە جانە وكىلەتتى ەلشى ديپلوماتيالىق دارەجەسى بار.
بۇعان دەيىن وبلىستى 9 جىل بويى دانيال احمەتوۆ باسقاردى. 15 ماۋسىم كۇنى ول 69 جاسقا تولدى.
