الدىمەن اقوردا، كەيىن ماڭعىستاۋ. قازاقستاننىڭ باتىس وڭىرىنە ات باسىن بۇرۋدى ماقسات ەتكەن گەرمانيا پرەزيدەنتى استاناعا كەلدى. مەملەكەت باسشىسى قاسىم-جومارت توقاەۆ ەلىمىزگە مەملەكەتتىك ساپارمەن كەلگەن گەرمانيانىڭ فەدەرالدى پرەزيدەنتى فرانك-ۆالتەر شتاينمايەر ءدى اقوردادا سالتاناتتى تۇردە قارسى الدى، دەپ حابارلايدى "ادىرنا" ۇلتتىق پورتالى.
گەرمانيادان جەتكەن مارتەبەلى مەيمانعا بار قۇرمەت كورسەتىلدى. سالتاناتتى راسىمدەر زالىندا قاراۋىلدار ساپ تۇزەپ، قوس مەملەكەت باسشىسىنا ايرىقشا قۇرمەت كورسەتتى. وسىدان كەيىن پرەزيدەنتتىك وركەستر ەكى ەلدىڭ مەملەكەتتىك ءانۇراندارىن شىرقادى.
كەيىن گەرمانيانىڭ فەدەرالدى پرەزيدەنتى قازاقستان پرەزيدەنتىمەن وتەتىن شاعىن قۇرامداعى كەزدەسۋ راسىمىنە كوشتى.
ناقتىلاپ ايتساق، قازاقستان پرەزيدەنتىنىڭ شاقىرۋىمەن ەلىمىزگە گەرمانيانىڭ فەدەرالدى پرەزيدەنتى فرانك-ۆالتەر شتاينمايەر مەملەكەتتىك ساپارمەن قازاق ەلىنە كەلدى.
ساپار اياسىندا ەكى مەملەكەت باسشىلارى قازاقستان-گەرمانيا ستراتەگيالىق سەرىكتەستىگىن نىعايتۋ ماسەلەلەرى بويىنشا كەلىسسوز جۇرگىزەدى. سونىمەن قاتار، بىرقاتار ماڭىزدى قۇجاتتارعا قول قويادى دەپ جوسپارلانعان.
گەرمانيا فەدەرالدى پرەزيدەنتى قازاقستان جانە گەرمانيا ۋنيۆەرسيتەتتەرى رەكتورلارىنىڭ فورۋمىندا ءسوز سويلەپ، قازاقستان پرەزيدەنتىمەن بىرگە قازاق-گەرمان بيزنەس فورۋمىنا قاتىسادى دەپ كۇتىلىپ وتىر.
بۇدان بولەك، مەملەكەتتىك ساپار اياسىندا فرانك-ۆالتەر شتاينمايەر ماڭعىستاۋ وبلىسىنا بارادى. ول ماڭعىستاۋدا قازاقستان-گەرمانيا ينجەنەرلىك ينستيتۋتىنىڭ اشىلۋىنا جانە Svevind شۆەد-گەرمان كومپانياسىنىڭ جاسىل سۋتەگى وندىرەتىن زاۋىتىندا سىناما بۇرعىلاۋ جۇمىستارىن ىسكە قوسۋ راسىمىنە قاتىسپاق.
"ادىرنا" ۇلتتىق پورتالى
اقوردا
مەملەكەتتىك ساپار
فرانك-ۆالتەر شتاينمايەر
گەرمانيانىڭ فەدەرالدى پرەزيدەنتى
استاناعا كەلدى
حالىقارالىق ديپلوماتيا
قازاقستان-گەرمانيا ستراتەگيالىق سەرىكتەستىگى
